Forstöðumaður Fornleifaverndar: Veitti Octopus enga heimild til þess að skoða skipsflök

Kristín Huld Sigurðardóttir, forstöðumaður Fornleifaverndar ríkisins segir leiðangursstjóra á snekkjunni Octopus enga heimild hafa fengið hjá stofnuninni til að kanna skipsflök við Íslandsstrendur. Áhöfn snekkjunnar hefur yfir að ráða kafbátum til þess að kanna flök neðansjávar. Í frétt Vísis í dag kom ranglega fram að áhöfnin hafi fengið leyfi frá Fornleifavernd.

Í samtali við Pressuna sagðist Kristín Huld ekki hafa fengið að vita af þessum leiðangri og því ekki hvaða skipsflak um væri að ræða en samkvæmt fréttum í dag mun utanríkisráðuneytið hafa gefið leyfi til að kanna tiltekið skipsflak. Ráðuneytið hefur hins vegar ekki svarað því hvaða skipsflak um sé að ræða, þrátt fyrir ítrekaðar fyrirspurnir, né hvort ekki sé nauðsynlegt að afla fyrst leyfis Fornleifaverndar.

Segir Kristín Huld lögin skýr hvað varði skipsflök sem eldri séu en eitt hundrað ára; engum nema fornleifafræðingum sé heimilt að snerta þau og alls ekki nema með leyfi Fornleifanefndar ríkisins.

Það er alveg sama hver á í hlut, hvort sem hann heitir Paul Allen eða ekki. Í Bandaríkjunum geta menn jafnan kafað niður að skipsflökum og tekið það sem þeir vilja en ekki á Íslandi.

Benti hún á að aðeins mætti skoða flök og taka myndir af þeim en ekki snerta né taka úr þeim muni.

Það virðist alveg hafa gleymst að tala við okkur hjá Fornleifavernd. Þetta er mjög furðulegt, þetta er svo leynilegt að það gleymist að tala við yfirvöld sem hafa með málið að gera.

Pressan hafði samband við Kristínu Huld undir kvöld til að forvitnast um hvort málin hefðu skýrst en hún hafði engar frekari upplýsingar og vísaði á utanríkisráðuneytið.

Utanríkisráðuneytið hefur ekki svarað fyrirspurnum Pressunnar, svo sem áður segir. Í kvöldfréttum RÚV kom fram að flökin, sem kafbátarnir hyggjast kanna, séu yngri en 100 ára, þannig að ekki hafi þurft leyfi frá Fornleifavernd.