Formaður Viðskiptanefndar: Vandamál að vera með ópólitískan viðskiptaráðherra

Formaður viðskiptanefndar Alþingis, Lilja Mósesdóttir telur það standa viðskiptaráðherra fyrir þrifum að vera ópólitískur. Lilja segir það standa ákvarðanatöku í ríkisstjórninni fyrir þrifum að viðskiptaráðherra hafi ekki pólitískt umboð frá kjósendum fyrir sín stefnumál.

Lilja og Guðlaugur Þór voru í Síðdegisútvarpi Rásar 2 í dag og ræddu vinnubrögð bankanna við endurskipulagningu fyrirtækja en eins og Pressan greindi frá í dag hefur Guðlaugur Þór farið fram á að fulltrúar Arion banka verði kallaðir fyrir viðskiptanefndar vegna vinnubragða við endurskipulagningu Haga og Samskipa.

Lilja og Guðlaugur voru sammála um að gegnsæið þyrfti að vera meira varðandi afskriftir bankanna en Lilja telur það eitt og sér ekki nóg heldur sé þörf á að ríkisstjórnin viti hvert eigi að stefna og fór hún yfir ástæður þess að ákvarðanir varðandi endurskipulagningu fyrirtækja hafi ekki verið teknar;

,,og kannski er vandamálið líka það að við erum með ópólitískan efnahags- og viðskiptaráðherra, hann hefur náttúrulega ekki fengið umboð frá kjósendum á grundvelli þeirra pólitísku stefnumála sem hann stendur fyrir. Þannig að mér finnst það vera okkar þingmanna að skilgreina hvert við ætlum."

Hægt er að hlusta á samræður þeirra tveggja í heild á vef RÚV.