Enn og aftur bullar Gylfi

Gylfi Magnússon, efnahags- og viðskiptaráðherra, segir að vegna þess hve mikið hafi þurft að afskrifa hjá gömlu eignarhaldsfélögunum sé ekkert svigrúm til afskrifta hjá heimilum og venjulegum rekstrarfélögum.

Orðrétt sagði ráðherrann:

Það er því miður þannig að það innheimtist mjög lítið af lánum til eignarhaldsfélaga. Mestu afskriftirnar eru þar. Það er hreinlega tapað fé. Það tapaða fé býr ekki til neitt svigrúm til að afskrifa annars staðar.

Ég vissi ekki hvort ég ætti að hlæja eða gráta, þegar ég sá þessi ummæli ráðherrans. Hvort skilur hann ekki hlutina eða fer vísvitandi með rangt mál? Og, hvort skyldi nú vera huggulegra, skilningsleysi ráðherra eða óheiðarleiki?

Lán eignarhaldsfélaganna fóru ekki yfir í nýju bankana. Þau sitja eftir í gömlu bönkunum, sem skilanefndirnar stjórna. Innheimtur af lánum eignarhaldsfélaganna hafa þannig engin áhrif á svigrúm til afskrifta í nýju bönkunum. Þeir fengu lán heimila og fyrirtækja á helmings afföllum til sín.

Ummæli ráðherrans eru með algerum ólíkindum og furðulegt, að hann skuli hafa verið fenginn til setu í ríkisstjórn út á faglega þekkingu sína.

Gylfi Magnússon þarf að skýra út hvað hann átti við með þessum ummælum sínum. Hann mætti líka varpa ljósi á þankagang sinn í tengslum við fleiri ummæli eftir að hann settist í ráðherrastól, en hann hefur ítrekað unnið gegn hagsmunum Íslands á erlendum vettvangi með óskiljanlegum yfirlýsingum við heimspressuna.

Yfirlýsing Gylfa er dæmigerð fyrir þessa ríkisstjórn. Stjórnin tekur enga ábyrgð á eigin aðgerða- og getuleysi heldur segist í sífellu vera að taka til eftir aðra. Sá söngur átti kannski við fyrstu mánuðina, en eftir rúmt ár af aðgerðaleysi dylst þjóðinni ekki, að þessi ríkisstjórn er ekki að gera neitt af viti.

Allt er einhverjum öðrum að kenna, segja stjórnarherrarnir og benda í allar áttir. Flestir hafa ráðherrarnir þó vit á að tala í hálfkveðnum vísum í stað þess að taka dæmi, sem hægt er að reka ofan í þá með áþreifanlegum rökum.

Gylfi, lán eignarhaldsfélaganna sitja inni í gömlu bönkunum. Þetta virðast allir vita nema þú og aðstoðarmaður forsætisráðherra. Viltu gera aðra tilraun til að skýra út hvers vegna nýju bankarnir draga lappirnar við að leysa vanda heimila og atvinnulífs?