Eigandi flugfélagsins flugþjónn um borð í fyrsta flugi: Skúli Mogensen lét drauminn rætast

„Það var óneitanlega stórkostlegt að sjá drauminn rætast á fimmtudaginn þegar við fórum í loftið í jómfrúarflugið eftir botnlausa vinnu allra sem koma að þessu ævintýri okkar undanfarna mánuði,“ segir Skúli Mogensen athafnamaður glaðbeittur, en Wow air, nýtt flugfélag þar sem hann er aðaleigandi og stjórnarformaður, hóf starfsemi sína með formlegum hætti nú um helgina eftir fyrsta flug til Parísar á fimmtudag.
 
Skúli hefur verið áberandi í aðdraganda þess að vélar Wow fari í loftið og greinilegt er að hann ætlar að blanda sér persónulega inn í reksturinn frá fyrsta degi. Í jólmfrúarfluginu vakti þannig athygli að Skúli var sjálfur í að rífa af brottfararspjöldum farþega og bjóða þá velkomna um borð, auk þess sem hann tók þátt í starfi flugþjóna á leiðinni til Parísar ásamt Baldri Baldurssyni forstjóra og Matthíasi Imsland rekstrarstjóra.

 
En hvers vegna að fara út í svo áhættusaman rekstur og stofna flugfélag á þessum tímum?
 
„Þetta er stórt og verðugt verkefni sem snýr ekki eingöngu að flugi heldur að því að efla ferðaþjónustu til og frá Íslandi í heild sinni,“ svarar Skúli glaðbeittur. Hann bendir á að ferðaþjónustan hafi skilað um 158 milljörðum í gjaldeyri í fyrra og því sé ljóst að um mikið hagsmunamál fyrir land og þjóð sé að ræða.

Það skiptir þess vegna gríðarlega miklu að við vinnum í sameiningu að því að tryggja að öll þjónusta og aðstæða hér á landi sé til fyrirmyndar.

 

Á fimmtudaginn var jómfrúarflug WOW air og var ferðinni heitið til Parísar en félagið mun hefja formlegt áætlunarflug til 13 áfangastaða í Evrópu í dag,  sunnudaginn 3. júní.

Flugfloti WOW air samanstendur af tveimur Airbus A320, 168 sæta flugvélum, með auknu sætarými og fótaplássi fyrir farþega. Vélarnar eru leigðar frá félaginu Avion Express og eru merktar WOW Force One og WOW Force Two með fjólubláum stöfum sem er einkennislitur WOW air. Fyrirtækið leggur mikla áherslu á einstaka þjónustu sem mun skila sér í mun léttari og skemmtilegri ferðaupplifun en Íslendingum hefur áður staðið til boða en félagið vill samsvara sér með flugfélögum eins og Virgin, South West og Kulula.

Félagið boðar aukna samkeppni á markaði en eitt af megin markmiðum er að gera flugferðir til og frá landinu ódýrari en áður hefur sést.  

Í dag starfa um 80 manns hjá félaginu en ráðningar á fjölmörgum starfsmönnum í viðbót standa nú yfir en um 450 manns sóttu um stöðugildi sem félagið auglýsti laus nýlega.  Félagið starfrækið einnig ferðaskrifstofuna WOW ferðir sem sérhæfir sig í ferðum á helstu áfangastaði móðurfélagsins og mun auka framboð sitt verulega á komandi misserum.
 
 
Að sögn Skúla hafa forsvarsmenn Wow air sett sér það markmið að horfa fram á veg og vinna að því að stækka markaðinn enn frekar. Hann segist sannfærður um að það eigi hagsmunaaðilar almennt að gera, enda sé hægt með samstilltu átaki allra aðila hæglega að tvöfalda árlegan ferðamannafjölda til Íslands á næstu 5-6 árum.
 
Og hvernig gekk svo fyrsta flugið?

Það gekk vel og ótrúlega gaman að upplifa slíka drauma verða að veruleika. Þetta er mjög skemmtilegur og dýnamiskur iðnaður þar sem maður er í nánu sambandi við fjölda fólks út um allan heim og alltaf jafn ánægjulegt að heyra hvað erlendum ferðamönnum finnst landið okkar magnað.

Skúli segir að gaman hafi verið að prófa sig í hlutverki flugþjónsins um borð:

Það var líka virkilega gaman að vera í flugþjónahlutverkinu um borð í fyrstu ferðinni og fá að taka þátt í að þjóna gestum okkar.  Ég skemmti mér konunglega og það er alveg ljóst að ég mun taka að mér flugþjónahlutverkið reglulega í sumar,  það jafnast fátt við það að fá að heyra beint í okkar farþegum um hvernig við getum haldið áfram að gera betur.  Það var óneitanlega líka mjög skemmtilegt að labba með glæsilegum hóp flugfreyja og þjóna í Paris og sjá viðbrögðin, þetta er frábær hópur og ég er mjög stoltur yfir þeirra frammistöðu.

Skúli undirstrikar að margir komi að því að hrinda slíkri hugmynd í framkvæmd. Hann vill nota tækifærið til að þakka fyrir sig í þeim efnum:

Ég vil þakka öllum þeim frábæru samstarfsaðilum sem eru búin að leggja mikið á sig undanfarið við að hjálpa okkur að koma WOW air af stað svo sem Ísavia, KFS,Flugmálastjórn, Avion Express, Rikku og Steingrími Sigurgeirssyni með frábæran mat og vín um borð svo eitthvað sé nefnt.  Síðast en ekki síst vil ég þakka öllu því góða fólki sem nú þegar er búið að tryggja sér miða með WOW í sumar,  ég hlakka til að sjá ykkur öll um borð!

Það var tilkomumikið að sjá flugvél Wow fara í loftið fyrsta sinni.