Apple hefur uppfært og bætt við tölvuúrvalið og kynnt nýjar útgáfur af OSX og iOS stýrikerfunum

Apple Worldwide Developer Conference (WWDC) ráðstefnan hófst í San Francisco á mánudag. WWDC er nú haldin í 23. sinn en ráðstefnan, sem stendur í fjóra daga, er haldin árlega af Apple fyrir forritara og þá er koma að þróun og hönnun forrita og aukabúnaðar fyrir vörur frá Apple. Ráðstefnan er mjög eftirsótt og virtist miðaverðið, tæplega 1.600 dollarar stykkið, ekki halda aftur af þeim sem áhuga hafa því 5.000 aðgöngumiðar seldust upp á tæpum 2 klukkustundum þegar sala þeirra hófst í apríl s.l.

Upphafskynningar ráðstefnunnar, sem kölluð er Keynote, er venjulega beðið með mikilli eftirvæntingu. Tim Cook forstjóri Apple hóf kynninguna á því að kynna nýjustu sölutölur forrita. 400 milljónir viðskiptavina eru skráðir með kreditkort í App-Store forritaverslunina þar sem 650 þúsund forrit eru nú til sölu og þar af eru 225 þúsund eingöngu fyrir iPad. Fram til þessa hafa notendur sótt sér 30 milljarða forrita í App-Store verslunina sem er opin notendum í 120 löndum, þ.á.m. á Íslandi og í næsta mánuði bætast 32 lönd við. Þó mörg forritana kosti ekkert hefur Apple greitt yfir fimm milljarða dollara til forritara og fyrirtækja sem selja vörur sínar í AppStore.

Beðið hefur verið með mikilli eftirvæntingu eftir að ráðstefnan hæfist því kvisast hafði út að von væri á nýjum tölvum frá Apple. Phil Schiller framkvæmdastrjóri markaðssviðs Apple olli engum vonbrigðum þegar hann kynnti nýjar útgáfur af MacBook Pro og MacBook Air fartölvum frá Apple þó vonast hafi verið til meira afgerandi uppfærslum. Helstu nýjungar í MacBook Air má nefna hraðvirkari gjörva, USB 3 tengi, 60% hraðvirkari skjástýringu, allt að 8 GB vinnsluminni og 512 GB SSD harðan disk með allt að tvöfalt meiri leshraða af disknum.

MacBook Pro tölvurnar voru einnig uppfærðar á svipaðan hátt en mesta athygli vakti þó ný fartölva sem fellur undir Pro flokkinn. Tölvan sem er með 15,4" skjá er mjög þunn eða svipuð og MacBook Air, létt um 2 kg og með allt að 7 tíma endingu rafhlöðu. Helsta nýjungin er án efa ný tegund skjáa sem kallast Retina Display og hafa þeir meiri skerpu, skarpari liti og 75% minni speglun á skjánum en áður þekkist. Mestu skiptir þó án efa upplausnin sem er 2880x1800 eða 220 punktar á tommu sem svarar rúmum 5 milljónum punkta í heildina. Það er fjórum sinnum meiri upplausn en samsvarandi skjáir í MacBook Pro línunni hafa boðið upp á og þremur milljónum punkta meiri upplausn en háskerpusjónvarp.

Tölvan fæst með allt að 16 GB innra minni og 768 GB SSD hörðum diski. Staðalbúnaður er m.a. SDXC kortarauf, HDMI tengi og USB 3 tengi ásamt 2 ofurhraðvirkum Thunderbolt tengjum fyrir auka skjái og utanáliggjandi diska, 802.11n staðall fyrir þráðlaus net og Bluetooth 4.0. Apple hefur hannað nýtt kerfi til kælingar tölvunnar sem er mjög hljóðlátt svo notandinn á sem minnst að verða var við þegar það er í gangi. Hægt verður að fá millistykki ef tengja þarf tölvuna við Ethernet eða tæki með FireWire tengi. Apple hefur nú hætt framleiðslu MacBook Pro með 17" skjá og verður hún ekki lengur fáanleg.

Að auki kynnti Apple nýja útgáfu OSX fyrir Apple tölvurnar, útgáfu 10.7, sem kallað er Mountain Lion. Kerfið var fyrst kynnt í febrúar á þessu ári og svipar notendaviðmótinu nú æ meira til iOS sem notað er á iPhone símum og iPad spjaldtölvum frá Apple. Mikið er gert úr samhæfingu milli Apple tækja í gegnum tölvuskýþjónustu Apple sem kölluð er iCloud. Stýrikerfið mun bjóða upp á raddstýrigu af sama meiði og er í iPhone símum Apple. Einnig hefur Safari vafrinn verið uppfærður og er enn hraðvirkari við Java-Script vinnslu en áður. Innan Apple er nú unnið hörðum höndum við að uppfæra helstu forrit sem til þess að nýta sem best nýju Retina Display skjáina í nýju MacBook Pro tölvunum.

Apple kynnti einnig iOS 6 sem er ný útgáfa stýrikerfisins fyrir iPod, iPhone og iPad. Um 200 nýjungar eru í kerfinu með mikið endurbættri raddstýringu sem kallast Siri. Siri hefur verið staðfært og skilur nú fleiri tungumál en eingöngu ameríska ensku eins og t.d. spænsku, ítölsku, kóreönsku ofl.

Bílaframleiðendurnir Mercedes, GM, Toyota, Honda, BMW ofl. ætla að bæta hnappi á stýrishjól bíla sína svo ökumaður sem er með tæki með iOS 6 geti kallað fram upplýsingar og stjórnað hluta af kerfum bílsins með aðstoð Siri. Samhæfing iOS 6 er mikil við Facebook og Twitter og Apple hefur uppfært landakortin í iOS 6 en eldri útgáfur notuðust við kort frá Google. Ein af nýjungunum er 'Flyover' sem sýnir þrívíddarmynd af þeim stað sem farið er um og að auki eru nú hægt að láta kerfið leiðsegja sér um götur og torg á leið frá einum stað til annars.

Að síðustu má geta þess að Apple hefur eftir tveggja ára bið loks uppfært Mac Pro tölvurnar sem ætlaðar eru í þyngri og meiri vinnslu og sem netþjónar. Uppfærslan var þó aðeins smávægileg og eru notendur og gagnrýnendur óánægðir með að ekki sé meira í lagt í þetta sinn. Tim Cook hefur þó óformlega svarað því til að von sé á algerri uppfærslu á næsta ári og þeir aðdáendur tölvunnar þurfi ekki að óttast að Apple muni yfirgefa þá með því að hætta framleiðslu þessara tölva.
Airport Express þráðlausar netstöðvar og ýmsir fylgihlutir með tölvunum hafa einnig verið uppfærðir og meðal nýjunga er að hver netstöð getur nú boðið upp á tvöfalt netkerfi, heimanet og gestanet.

Elías Alfreðsson tók saman.