Rihanna og Beyoncé dýrastar - Paris Hilton á botninum

Rihanna. Getty Images

Eins og venjan er, þegar mikilvægar tískusýningar fara fram, sitja stórstjörnur á fremsta bekk og fylgjast með nýjustu tísku. Einhverjir gætu haldið að stórstjörnurnar hefðu brennandi áhuga á tísku og væru þess vegna á fremsta bekk. Sannleikurinn er hins vegar sá að tískuhús greiða fúlgur fjár til stjarna um leið og þær eru fengnar til þess að fylgjast með frá 1. bekk.

Eins og fram kemur á miðlinum Fashionista er stjörnunum skipt í flokka eftir mikilvægi, allt frá A-flokki niður í D-flokk. Greiðslan fyrir stjörnur í A-flokki sem sitja á fremsta bekk er alveg upp í 100.000 dollara sem er meira en 12 íslenskar milljónir. Það eru drottningar eins og Rihanna og Beyoncé sem geta rukkað slíka upphæð. Olsen-tvíbbarnir eru einnig sagðar í A-flokki sem og Lindsay Lohan og Chloé Sevigny þó þær fái ekki jafnmikið fé og þær fyrstnefndu.

Í B- og C-flokki er að finna manneskjur á borð við Hillary Duff og Kim Kardashian. Paris Hilton og America's Next Top Models sigurvegarar eru sagðar í D-klassa, þær fá alltaf boðskort á fremsta bekk, en er aldrei greitt fyrir að mæta. Þar höfum við það!