21. des. 2009 - 18:00Marta María

Gómsæt kalkúnafylling sem stendur alltaf fyrir sínu

Gómsæt kalkúnafylling.

Gómsæt kalkúnafylling.

Kalkúnafyllingin er stór hluti af máltíðinni þegar þessi risavaxni fugl er eldaður. Þá sem þyrstir í að prófa eitthvað nýtt þá er þessi fylling mikið lostæti. Þeir sem ætla hinsvegar ekki að elda kalkún ættu endilega að prófa að fylla kjúklinga og elda á sama hátt og kalkún. Það er sniðugt fyrir fámennari hátíðahöld og smakkast alls ekki síður.

Væn smjörklípa
1 stór laukur, saxaður
200 g ferskir sveppir
250 g gulrætur
50 g þurrkuð epli
50 g þurrkaðar apríkósur
6 sneiðar af grófu brauði
1 dl rjómi
1 dl vatn
2 tsk grænmetiskraftur
½ tsk salvía, má vera meira
½ tsk svartur pipar
1 tsk oregano

Leggið eplin í bleyti í kalt vatn ásamt apríkósum.

Setjið smjörið í pott og kveikið undir. Skerið laukinn og sveppina frekar smátt og setjið út í smjörið. Látið þetta krauma í fimm til tíu mínútur. Hreinsið gulrætur og rífið þær niður frekar gróft og bætið út í. Þá eru þurrkuðu eplin og apríkósurnar teknar úr vatninu og skornar smátt og bætt út í. Nú er kryddið sett út í. Þá er brauðið skorið í teninga og bætt út í. Hrærið vel saman.

Það er ekkert verra að búa fyllinguna til daginn áður en kalkúnninn er eldaður. Þá tekur hún sig ennþá betur.