Helgi Péturs sá kynþokkafyllsti til dauðadags?

„Ég bara skil ekki hvað útvarpsstjóra RUV gengur til að láta það viðgangast ár eftir ár að starfsmenn hans verji skattfé okkar landsmanna í að láta kjósa kynþokkafyllsta karlmann landsins. Þeim peningum væri svo sannarlega betur varið  í aðra dagskrárgerð. Kynþokkafyllsti karlmaður landsins var kosinn fyrir meira en 30 árum. Á meðan hann heldur fullum kynþokka þarf ekki að vera að standa í svona kosningum,” segir Helgi Pétursson, sem lesendur völdu kynþokkafyllsta mann Íslands í kosningu sem Samúel efndi til árið 1977.



Í viðtali við Samúel.is fyrir tveimur árum sagðist Helgi hafa fundið að þessu við dagskrárgerðarmenn Rásar 2. „Ég hef marg ítrekað við þá, að á meðan hið virta tímarit Samúel hafi ekki séð ástæðu til að endurtaka þessa kosningu þurfi ekkert að fara í grafgötur með það, hver sé flottastur á landi hér. Niðurstaðan stendur því á meðan ég lifi.”


Saklausum karlmönnum stillt upp til keppni

„Á sínum tíma stillti Samúel upp átján karlmönnum sem valdir höfðu verið til keppninnar af kostgæfni. Þeir voru ekki spurðir leyfis og kærðu sig kollótta. Allir nema einn, leikarinn Hjalti Rögnvaldsson, sem baðst kurteislega undan því að vera í framboði. Gaf ekki kost á sér, eins og sagt er.

Þjóðin kaus og Helgi Pétursson í Ríó Tríói hlaut sannfærandi kosningu. Þeir sex sem komust næst því að vinna titilinn voru (í stafrófsröð): Árni Gunnarsson fréttamaður, Heiðar Jónsson snyrtir, Jakob Frímann Magnússon Stuðmaður og Jónas R. Jónsson söngvari, Rúnar Júlíusson og Stefán Hallgrímsson.


Myndataka í frosti

Helga var úthlutað titlinum Herra Samúel og plataður niður á Laugardalsvöll í myndatöku í hörku frosti. Honum var afhent stórmyndarleg stytta til eignar, nokkrum myndum var smellt af og athöfninni þar með lokið. Síðan hefur hann setið uppi með titilinn.

Nokkurrar óánægju gætti meðal lesenda Samúels af veikara kyninu með afgreiðslu málsins. Til dæmis sendi húsmóðir í Höfn blaðinu bréf þar sem hún sagðist vera ánægð með lesefnið í Samúel en vildi gera athugasemd við jafnréttismálastefnu ritstjórnar. „Þegar Samúel efndi til fegurðarsamkeppni kvenna voru margar nektarmyndir teknar af fegurðardísunum – sem mér finnst alveg sjálfsagt. Herra Samúel var kosinn á annan hátt. Litlar og lélegar andlitsmyndir komu í staðinn fyrir nektarmyndirnar. Ekki svo að skilja að Helgi Pétursson hafi ekki átt titilinn skilið, einmitt rétti maðurinn.” Kona með fangamerkið G.G. skrifaði á sömu nótum og lýsti vanþóknun sinni á að Helgi hafi komist upp með að vera með trefil og allar græjur á myndunum í Samúel.

Verðlaynastyttan í öndvegi á heimilinu

Þegar Samúel heimsótti Helga til að rifja upp „krýninguna” hugleiddi hann að stinga upp á því við kyntröllið að nú yrðu þrítug mistök leiðrétt. Hann pósaði berrassaður í stofusófanum. En Samúel gugnaði á því þegar á hólminn var komið. Kannski Samúel hafi tekist að safna nægilegum kjarki til þess þegar hann heimsækir kyntröllið aftur að öðrum þrjátíu árum liðnum

Verðlaunatyttan er enn höfð í öndvegi á heimili Helga. Hún stendur í sjónvarpsherberginu og segir Helgi að þá sjaldan að hann fái gesti í heimsókn sem ekki þekki tilurð styttunar séu þeir óðara upplýstir um hvernig hún er til komin. „Það undrast náttúrulega enginn að ég hafi verið verðlaunaður fyrir kynþokka,” segir Helgi.

Í viðtali við blaðið skömmu eftir verðlaunafhendinguna 1977 sagði Helgi: „Það hefur væntanlega aukið á sigurmöguleika mína, að ég fer alltaf á fætur klukkan fimm á morgnana og borða góðan morgunmat. Einnig stunda ég badminton öðru hvoru svo ég minnist nú ekki á ballett æfingarnar sem ég stundaði í tíu daga. Þetta gerir mann hressan á sál og líkama.“


 „Vona bara að þetta hafi ekki verið illa meint“

Hann kvað konu sína hafa hlegið mikið og ískyggilega lengi þegar hún frétti af sigri hans í keppni Samúels. „Ég meina, var þetta ekki bara saklaust gaman? Ég vona bara að þessi keppni hafi ekki verið illa meint," sagði hann í Samúelsviðtalinu fyrir 33 árum. Kvaðst þá ætla að kaupa sérstaka hillu undir styttuna og hafa hana á áberandi stað. „Ég þarf svo að fara að hugsa út einhverja skýringu fyrir börnin. Það fyrsta fer alveg að koma.“
Börnin eru fjögur og stoltur sýndi Helgi Samúel ljósmynd af þeim þegar viðtalið var tekið við hann fyrir tveimur árum. „Sérðu fegurðina? Ótrúlegt hvað genin erfast.“ Börnin heita Snorri, framkvæmdastjóri FTT, Heiða Kristín stjórnmálafræðinemi, Pétur nemi í stoðtækjafræðum í Svíþjóð og Bryndís, kennari við Hlíðaskóla.


Breytilegur hlátur gestanna

Þegar Samúel ræddi við Helga 1988 sagði hann fjögurra ára dóttur sína þegar vera farna að hlæja að styttunni af bera manninum. Hann væri búinn að snúa framhliðinni með skildinum á styttunni (og limnum) að vegg og héldi gripnum ekki mikið að gestum. Hláturinn, sem var glaðlegur í fyrstu, væri farinn að hljóma pínulítið ónotalega. Það hefur svo greinilega breyst aftur með tímanum, eins og fram kom í viðtali okkar við Herra Samúel fyrir tveimur árum – enda eldist hann sérlega vel. Samúel sér ekki neina ástæðu til að kjósa að nýju enn sem komið er.

 

Hvert sækir Helgi orkuna?

Áður en Samúel kvaddi sinn mann vildi hann vita hvað Helgi hefði fyrir stafni í dag. „Ég er vefstjóri Orkuveitunnar, sé um heimasíðu fyrirtækisins og útgáfumál, auk þess að vinna mikið að aðkomu OR að þróun ferðaþjónustu, m.a. með ítarlegri sýningu á umhverfisvænni orkunýtingu jarðhita í Hellisheiðarvirkjun. Þangað hvet ég alla til þess að fara,“ svaraði Helgi og vísaði á OR.IS eftir frekari upplýsingum.