30. jan. 2011 - 11:00
Getty Images
Tónmenntafólk, kennarar, nemendur og hljóðfæraleikarar, ætla að koma saman við Ráðhúsið í Reykjavík á þriðjudag, þegar borgarstjórn kemur saman á fundi, og mótmæla skerðingum til tónlistarskóla. Niðurskurðinum verður ekki tekið þegjandi og hljóðalaust.
Pressan hefur sagt frá því að til standi að skera niður framlag til tónlistarskóla í Reykjavík um 140 milljónir króna þegar nýir þjónustusamningar taka gildi.
Af því tilefni hefur verið stofnuð Facebook-síða undir yfirskriftinni Samstaða um framhald tónlistarskólanna og spurt:
ER EKKI EITTHVAÐ SEM VIÐ GETUM GERT? EIGUM VIÐ EKKI AÐ MÓTMÆLA ÞESSU?
Næsti fundur borgarstjórnar sé þriðjudaginn 1. febrúar kl. 14 í Ráðhúsinu.
Þið hafið vonandi flest fylgst með ógnvænlegum pistlum á Pressunni síðastliðnar vikur. Lítið hefur birst í öðrum fjölmiðlum um þetta vandamál sem blasir við framtíð tónlistar á Íslandi. [...] Eigum við bara að sitja þegandi og hljóðalaust og láta þetta yfir okkur ganga?
En það stendur ekki til.
Hljóðfæraleikar, tónlistakennarar og nemendur þeirra ætla að mótmæla fyrir utan Ráðhúsið þegar borgarstjórnarfundurinn er haldinn.
Magnús Trygvason Eliassen, einn af aðstandendum Facebook-síðunnar, segir í samtali við Pressuna að leikið verði á skemmtileg hljóðfæri.
Þetta verður ekki hávaði heldur tónlistarflutningur. Það missir enginn heyrnina.
Hann segir fullan skilning ríkja á því að skera þurfi niður eins og nú árar.
En hlutfallið eins og maður hefur séð hjá ykkur er úr öllu korti og aldursviðmiðun tómt kjaftæði, fyrirgefðu orðbragðið. Fólk hefur leyfi til að endurmennta sig í háskólum eftir 24 ára aldur, hvers vegna skyldi það ekki eiga við um tónlist?
Á Facebook-síðunni segir að yfir 30 prósent skerðing á fjárveitingum geri gjörsamlega út af við marga ef ekki flesta tónlistarskóla borgarinnar.
Og hvar endar þetta? Dreifist þetta sem illkynja mein um landsbyggðina?