30. jún. 2009 - 12:00Marta María
Leifur Welding hannaði Fiskfélagið. Mynd: Úr einkasafni
Á dögunum opnaði veitingastaðurinn, Fiskfélagið, sem er staðsettur í húsi sem nýlega var flutt á torgið við Vesturgötu í Reykjavík. Á staðnum er boðið upp sjávarrétti þar sem lögð er áhersla á að nota sem mest af íslensku hráefni, bæði í fiskmeti og kryddi. Eigendur staðarins eru Lárus Gunnar Jónasson matreiðslumaður og Guðmundur Hansson veitingamaður og fyrrverandi eigandi Lækjarbrekku.
Fiskfélagið er smekklega innréttað af Leifi Welding. Hann hefur verið viðriðinn hönnunarbransann í tíu ár. Þegar hann er spurður að því hvort þetta sé fyrsti staðurinn sem hann hannar þá segir hann svo ekki vera.
„Ég hef verið viðriðinn hönnun á veitingarstöðum og hótelum í rúmlega 10 ár. Ég hef til dæmis hannað, í samvinnu við eigendur hvers og eins staðar, staði eins og Sjávarkjallarann, Fiskmarkaðinn, Silfur ofl. Þetta byrjaði allt á sínum tíma með því að ég var að vinna við að selja húsgögn og innréttingar inn á veitingarhús og hótel sem færðist út í að skipuleggja og hanna staði frá a til ö,“ segir Leifur og bætir við: „Í framhaldinu stofnaði ég Saltfélagið ásamt Pennanum og Lumex,“ segir hann en hann seldi sinn hlut í Saltfélaginu í apríl 2008. „Þetta voru skemmtilegir og frjóir tímar enda voru Íslendingar mjög kaupglaðir á þessum árum og vildu hafa fallega hönnun heima hjá sér.“
Þegar Leifur er spurður út í Fiskfélagið segist hann hafa reynt að búa til hlýlega og skemmtilega stemningu. „Þetta á að vera notalegur staður sem öllum líður vel á. Ég nota mikið af mjúkum og hlýjum hlutum, plussefni og mikið af kertum. Bak við barinn eru tæplega 100 ára gamlir gluggar sem voru upphaflega í Fríkirkjunni í Hafnarfirði. Þeim átti að henda fyrir átta árum en við náðum að bjarga þeim,“ segir Leifur.
Hann hefur smekk fyrir fallegri hönnun en á veggjum Fiskfélagsins hangir til að mynda elgur frá Northernlighting, risalampinn frá Max Inc, ruggustóllinn frá Hans J. Wegner í bland við verk eftir nema Listaháskóla Íslands.
Síðustu mánuði hefur Leifur unnið að hönnun Arctichótel sem er í smíðum í Brautarholti. Það er 4 stjörnu hótel með 107 herbergjum. „Ég er einnig að vinna með félaga mínum í íbúðarhótel concepti sem heitir Apartment K og Element K. Vorum að bæta við núna 7 íbúðum á Hverfisgötu. Þar erum við með „Boutique“ hótelíbúðir með öllu. Þær íbúðir eru að mestu leiti innréttaðar með húsgögnum og ljósum frá MOOOI, TOM DIXON, FLOS og B&B ITALIA,“ segir Leifur.
Hvað er það skemmtilegasta við að innrétta hótel og veitingastaði? „Það er að sjá þegar þeir hitta í mark. Að þeir gangi vel og selji vel. Það tekur langan tíma og mikinn undirbúning að hanna veitingarstað sem á að ganga vel. Við Lárus erum til dæmis búnir að vera í tæpt ár að vinna að Fiskfélaginu. Lárus býr á Ítalíu svo að öll okkar samskipti og vinna hafa farið fram á netinu,“ segir Leifur.
Þegar Leifur er spurður að því hvað sé framundan segist hann vera störfum hlaðinn. „Ég hef verið að vinna í svipuðum verkefnum erlendis og mun halda því áfram. Það er margt spennandi í pípunum en allt of snemmt að segja frá því núna,“ segir hann.