04. des. 2016 - 07:00Arnaldur Máni Finnsson

Þegar öllu er snúið á hvolf

Við höfum tilhneigingu til þess að líta svo á að allt sé að færast í rétt horf þegar jólin nálgast. Aðventan er nú hafin og eftirvæntingin eftir því að allt geti orðið „eins og það á að vera“ fyllir okkur kærleika, örlæti, hlýju og von. Þessi tilfinning er ýmsu háð; hefðum og siðum, aðstæðum hverju sinni, hverju við búumst við, hvað við vonum á. Aðventan er sérstakur tími fyrir alla, hverjar sem trúarskoðanir þeirra eru. Tími minninga og fjölskyldutengsla, tími ræktarsemi og uppskeru, ef það myndmál má nota um félagslega þáttinn í lífi okkar. Það getur verið erfitt að setja þetta allt í samhengi við það sem skiptir máli; en lífið er öfugsnúið ef að er gáð. Það má nefnilega segja að öllu sé snúið á hvolf í heimsmynd okkar þegar við reynum að rétta hana af fyrir jólin.

Það er óþarfi að telja upp siðina og hefðirnar sem við tengjum okkur við, til þess að ná einbeitingu til að breyta samhenginu sem við lifum í dags daglega. Það er til hátíðarbrigða. Heimabakað, hundruð þúsunda af „óþörfum“ handtökum tryggja að við séum í snertingu við þetta „ekta“ í einu og öllu – rjúpan, sultan, ísinn og þetta eina sanna jólaskap; við leggjum í raun og veru allt undir. Hver einustu jól. Og uppskerum? Jú spennufallið er þannig að við sprengjum frá okkur allt vit á áramótunum. Guði sé lof.

Nú er ég vissulega að ýkja en líf okkar á öllum öðrum tímabilum ársins gengur einhverskonar vanagang þar sem við spennum bogann ekki jafn kröftuglega, við brúkum ekki mælistikur eilífðarinnar af sama móð, sálarfriður fjölskyldna stendur ekki og fellur með rétt upp settri umgjörð um hið heilaga og fullkomna. Við kunnum öll að meta þennan „fasta punkt“ í tilverunni – það sem er alltaf á hinum heilögu nótum „eins“ – en við verðum að muna að það er ekki þá sem allt verður rétt og satt. Þegar við komumst á fasta punktinn þá erum við einmitt búin að snúa öllu á hvolf, og þá á ég ekki bara við að það sé búið að þrífa hátt og lágt eða umbreyta myrkrinu með þúsundum jólaljósa. Við beinum sjónum okkar að hinu smáa í samhengi við önnur viðmið en venjulega. Við sameinumst um hugsjónir og gildi í takt við jólasöguna af litlu barni sem fæðist í heiminn, í faðm fátækra foreldra á ferðalagi, en boðar með tilveru sinni að öllu verði snúið á haus. Að valdahlutföllin færist frá hinu veraldlega til hins andlega. Að hið saklausa verði metið að verðleikum. Að undrast. Að fyrirgefa. Skilja. Endurmeta. Sjá hlutina eins og þeir eru. Það er gott.

Íhugum á aðventunni

Væntingar okkar fullorðna fólksins breytast á aðventunni rétt eins og barnanna. Og kannski væntum við þess eins að allt verði eins og það var. Því fylgja sorgir fyrir þá sem hafa misst og því fylgir jafnvel örvænting í ranni þeirra sem gera ekki ráð fyrir að standast þær væntingar sem til þeirra eru gerðar. Jólaskapið er ekki eintóm gleði heldur líka friðsæll hugur þess sem endurmetur og skoðar gildi sín og viðmið. Hvernig samfélagi viljum við lifa í? Hvaða boðskap bera hefð og siðir með sér? Segir allt skrautið og verðmiðarnir á pökkunum okkur allt um það hver við erum og hvað við þráum? Eða er það glansmyndin af okkur sjálfum? Við getum vonað og varpað upp mynd, en leitumst við að allan ársins hring séum við þessi besta útgáfa af okkur sjálfum. Við skulum ekki pakka því öllu saman niður um leið og hátíð er gengin um garð.

 




16.feb. 2017 - 21:00 Austurland

Ljósin lifna á Seyðisfirði: „Veisla fyrir skynfærin“

Dagana 24. og 25. febrúar 2017, mun hátíðin List í Ljósi kveikja á ljósum sínum á ný en að sögn aðstandenda hennar eru áhorfendur hátíðarinnar um leið virkir þáttakendur. Þeir munu eiga von á magnaðri upplifun í gegnum fjölbreytt ljósverk; allt frá innsetningum og vidjóverkum til stærri ljósaskúlptúra. Innlendir og erlendir listamenn taka þátt í hátíðinni, sem lýsir upp Seyðisfjörð.
15.feb. 2017 - 17:00 Austurland

Stóra bruggmálið á Seyðisfirði: „Lögreglumaður í annarlegum tilgangi er að flækjast um í húsinu án húsleitarheimildar“

Á Alþingi er vinna við frumvarp um breytingar á lögum langt komin, sem myndi færa íslenskt lagaumhverfi nær því sem tíðkast á Norðurlöndunum þegar kemur að gerjun léttra veiga til einkaneyslu. Að sögn Pawels Bartoszeks þingmanns Viðreisnar sem verður flutningsmaður þess er víðtækur stuðningur við frumvarpið.
15.feb. 2017 - 13:30 Austurland

Austri og Beljandi tilbúnir í slaginn!

Austfirsku brugghúsin sem nú eru að komast á koppinn stefna að því að bjóða upp á nokkra ólíka stíla í takt við aukningu á framboði og eftirspurn eftir öli af ýmsum gerðum frá fjölmörgum smá-brugghúsum (micro-brewery) sem hafa tekið til starfa á Íslandi á síðustu árum. Segja má að báðir aðilarnir stígi varlega til jarðar og byrji með minnstu mögulegu yfirbyggingu á slíkum rekstri, en það eru tveir 300 l. suðukatlar, og 6 gerjunar eða geymslutankar af sömu stærð.
14.feb. 2017 - 08:30 Austurland

Opnun rannsóknaseturs HÍ frestað

Opnun rannsóknaseturs Háskóla Íslands á Egilsstöðum verður frestað um ár vegna fjárskorts skólans. Staða akademísks sérfræðings verður framlengd en Bæjarráð Fljótsdalshéraðs samþykkti á fundi sínum í síðustu viku yfirlýsingu um stofnun rannsóknaseturs á Egilsstöðum og áframhald rannsókna á Austurlandi. Á sama tíma var vonbrigðum lýst vegan tafanna.
13.feb. 2017 - 15:17 Austurland

Bakkfirðingar vilja austur

Skeggjastaðasókn í Langanesbyggð verður að öllum líkindum lögð undir Hofsprestakall á Kirkjuþingi síðar í mánuðinum en Vopnfirðingar hafa fyrir sitt leyti samþykkt breytingarnar sem og Bakkfirðingar. Seint í janúar samþykkti sóknarfólk í Hofsprestakalli fyrir sitt leyti tillögu Biskups um breytta skipan þjónustunnar í prestakallinu.
12.feb. 2017 - 15:00 Austurland

Austfirzk brugghús

Með vorinu munu tvö austfirsk brugghús verða komin í gagnið en Austri Brugghús hóf kynningu á framleiðslu sinni á Egilsstaðablótinu á dögunum. Hvorugt brugghúsið er tilbúið að gefa upp hvaða nöfn nákvæmlega framleiðslulínurnar munu bera en áætlanir fyrirtækjanna eru hófstilltar til að byrja með og gera ráð fyrir að festa sig í sessi á heimamarkaði til að byrja með, á austfirskum börum og veitingahúsum.
12.feb. 2017 - 13:00 Austurland

Eyrarrósin 2017: Eistnaflug, Rúllandi snjóbolti 7 og List í ljósi tilnefnd

Helmingur þeirra verkefna sem eru tilnefnd til Eyrarrósarinnar í ár eru austfirsk en sex ólík menn­ing­ar­verk­efni á lands­byggðinni sem hafa verið val­in á Eyr­ar­rós­arlist­ann 2017 og eiga þar með mögu­leika á að hljóta Eyr­ar­rós­ina í ár. Ausfirsku verkefnin eru Eistna­flug í Nes­kaupstað, List í ljósi á Seyðis­firði og Rúllandi snjó­bolti á Djúpa­vogi.
11.feb. 2017 - 16:00 Austurland

Þórunn valin Austfirðingur ársins

Þórunn Ólafsdóttir frá Fáskrúðsfirði var valin Austfirðingur ársins 2016 af lesendum Austurfréttar. Þórunn hlýtur viðurkenninguna fyrir störf sín til hjálpar flóttamönnum og fyrir að vekja athygli á kynferðislegri áreitni í garð fiskvinnslufólks.
11.feb. 2017 - 13:00 Austurland

LungAskólinn lengist

LungA skólinn á Seyðisfirði sem opnaður var formlega árið 2014 hefur nú ákveðið að bjóða uppá nýja námsleið sem nefnist ‘175’, og vísar til þess að önnin er 175 daga löng. Nýja námsleiðin verður starfrækt samhliða núverandi námsleið sem stendur yfir í 84 daga í senn.
11.feb. 2017 - 06:00 Austurland

Sjómannaafslátturinn: Ríkisstyrkur til útgerðanna

Ríkisvaldið á ekki að höggva á deilur á vinnumarkaði með því að koma á fót ríkisstyrkjum til útgerðanna í formi sjómannaafsláttar segir fjármálaráðherra. „Mér finnst að fyrirtækin eigi að borga þann kostnað sem fer í þeirra starfsmenn og að það sé eitt skattkerfi fyrir alla. Þetta eru ekki þau fyrirtæki sem eru veikust á landinu heldur fyrirtæki sem hafa sýnt ágæta afkomu.
09.feb. 2017 - 13:45 Arnaldur Máni Finnsson

Leikur með tölur?

Nú hefur verkfall sjómanna staðið yfir í tæpa tvo mánuði og áhrifin af því fyrir land og lýð verið gífurleg. Tekjur launafólks dragast saman, verkafólk sækir bætur í atvinnuleysistryggingasjóð og skatttekjur ríkis og sveitarfélaga minnka. Ótalin er samdráttur annarra fyrirtækja sem þjónusta sjávarútveginn.
30.jan. 2017 - 12:00 Austurland

Tekið opnum örmum

„Það var mikil breyting í lífi okkar stelpnanna að flytja austur, burt frá öllu okkar stuðningsneti og því sem dætur mínar hafa vanist í sínu lífi. En hér hefur samfélagið tekið alveg óskaplega vel á móti okkur og við allar smollið vel inní, hvort sem er þær í skólann eða ég í starfið,“ segir Erla Björk Jónsdóttir, nývígður héraðsprestur Austurlandsprófastsdæmis.

29.jan. 2017 - 14:30 Austurland

Rauði Krossinn kynnir viðbragðsverkefni

Á dögunum heimsótti Karl Lúðvíksson fulltrúi Rauða Krossinn, nemendur í grunnskólum á Austurlandi til þess að kynna verkefni sem stuðlar að því að efla viðnámsþrótt Íslendinga gegn óvæntu neyðarástandi. Verkefnið nefnist 3 dagar og er alþjóðlegt en miðar að því að hvert heimili sé undirbúið hamförum og neyðarástandi með heimilisáætlun og viðlagakassa. Með heitinu „3 dagar" vill Rauði krossinn impra á mikilvægi þess að einstaklingar og fjölskyldur geti verið sjálfum sér nægar í 3 daga eigi sér stað rof á innviðum.

29.jan. 2017 - 07:00 Austurland

KrakkaRúv leitar til austfirskra krakka

Í næsta mánuði hefst námskeið sem miðar að því að kenna krökkum í grunnskólum á Austurlandi að vinna útvarpsefni fyrir Stundina Okkar á Rás 1. Þátturinn og námskeiðið er í umsjón Sigynar Blöndal og verður haldið í Menningarmiðstöð Fljótsdalshéraðs.

28.jan. 2017 - 19:00 Austurland

Í landi útskúfunar og ofbeldis

Það er ekki af góðu sem ákveðið er að fjalla um grænlenskar bókmenntir að þessu sinni en í ljósi nýliðinna atburða er ekki úr vegi að glöggva sig aðeins á þessari grannþjóð okkar sem marga fjöruna hefur sopið. Skáldheimur hinnar þrítugu Sörine Steenholdt, sem birtist í smásagnasafninu Zombílandi, er fullur af örvæntingu, ofbeldi, alkohólisma og hryllingi einhverskonar nástaðar á mörkum hins siðaða heims. Í raun og veru er hér einhver al-versta landkynning sem mögulega hægt væri að bjóða uppá ef þessi grænlenski höfundur væri að hugsa um það að kynna land, þjóð og tungu – eins og íslenskum höfundum er einatt svo annt um.

28.jan. 2017 - 18:00 Austurland

Hvað er nýsköpun?

Í mínu starfi hér á Austurlandi hefur mér gefist sá heiður að umgangast fjölbreyttan hóp fyrirtækja, einstaklinga og stofnana í þeim tilgangi að vinna með orðið nýsköpun á margvíslegan hátt. Með námskeiðum, keppnum og annarri fræðslu hafa skapast líflegar umræður og það sem er ekki síður mikilvægt, vangaveltur um hvað sé nýsköpun.

27.jan. 2017 - 18:00 Austurland

Áfangastaðurinn Austurland kynntur

Þessar vikurnar er að hefjast markaðsátak Austurbrúar og ferðaþjónustuaðila á Austurlandi undir sameiginlegum merkjum þar sem landshlutinn er kynntur sem heild. Mikil ánægja er á meðal ferðaþjónustuaðila um hið samræmda átak sem hefur lyft kynningarmálum aðila á svæðinu á allt annan stað ef miðað er við nokkur ár aftur í tímann. Frumraun átaksins var á Mannamóti, árlegri sýningu ferðaþjónustunnar fyrir ferðaheildsala sem fram fór í Reykjavík í síðustu viku en átakið var einnig kynnt heimafólki s.l. mánudag á Flugvellinum á Egilsstöðum. Segja má að hið samræmda útlit hafi vakið verðskuldaða athygli á sýningunni í Reykjavík en Austurland er fyrsti landshlutinn sem leggur í þá vinnu að kynna aðila í ferðaþjónustu á svæðinu sem eina heild.

27.jan. 2017 - 11:48 Arnaldur Máni Finnsson

Samhugur gegn hlutgervingu

Örlög Birnu Brjánsdóttur eru viðvörunarbjalla sem glymur um að við megum ekki slá slöku við eða snúa af þeirri braut sem mörkuð hefur verið af kynslóðunum á undan okkur, um að virðing og jafnræði verður að vera fyrir hendi í öllum samskiptum kynjanna. Hluttekning þjóðarinnar þegar ljóst var að Birna væri látin sýndu vel að ógn og skelfing atburðarins, kynbundins ofbeldis sem leiddi til dauða og hylmingar yfir þeirri staðreynd, snerti hvern mann. Orð fengu litlu lýst. Og vonleysið er átakanlegt þegar við getum ekkert gert. En hvað getum við gert?

17.jan. 2017 - 07:00 Austurland

Læra menn aldrei af reynslunni?

Um 1930 ætluðu kappsfullir fjáraflamenn að bæta efnahag sinn og landsmanna með minkaeldi á Íslandi.  Þessar lífverur sem menn bundu vonir sínar við , tolldu illa í haldi og urðu að plágu í íslensku lífríki eins og við þekkjum öll.  Innflutningur á erlendu sauðfé breiddi líka út sjúkdóma sem urðu þjóðinni mjög dýrir við að fást. 
16.jan. 2017 - 18:00 Austurland

Sameiningamálin

Nú í upphafi árs er ástæða til að rýna aðeins stöðu sveitarstjórnarstigsins og horfa aðeins fram á veginn, að svo miklu leyti sem það er hægt í heimi mikilla umbreytinga þar sem takast þarf á við nýjar áskoranir á degi hverjum. Efling sveitarstjórnarstigsins er málefni sem virðist nú komið aftur á verulega hreyfingu og er Innanríkisráðuneytið meðal annars um þessar mundir að efna til funda um málefnið á sameiginlegum vettvangi sveitarfélaga.
15.jan. 2017 - 19:00 Austurland

Blómlegt ár hjá Björgunarsveitinni

„Við erum núna að njóta ávaxtanna af miklu uppbyggingarstarfi síðustu ár,“ segir Kjartan Benediktsson en hann segir endurbætur á aðstöðu og tækjakosti Björgunarsveitarinnar Héraðs gerbreyta stöðu sveitarinnar til næstu ára. „Horfandi svona fjögur til sex ár aftur í tímann þá er þetta algjör umskipti, því það gerist mjög oft hjá fáliðuðum sveitum að menn brenna algjörlega út. Það var þarna á tímabili þar sem gríðarlegur fjöldi útkalla var farinn að sliga sveitina þar sem það voru kannski sömu 4-5 menn sem voru að sinna öllum útköllum. Það er bara ekki hægt til lengdar.“
15.jan. 2017 - 18:00 Austurland

Felst framtíðin í minningum barnanna okkar?

Ef manni líður vel í uppvextinum eykur það líkurnar á því að minningar æskuáranna verði góðar. Líklegt verður að teljast að góðar æskuminningar auki áhuga fólks á því að búa þar sem minningarnar urðu til og þá skoðun styðja m.a. niðurstöður rannsókna á viðhorfum brottflutts fólks til uppeldisstöðvanna.

15.jan. 2017 - 11:59 Austurland

Uppgjör við fréttaárið 2016

Við Íslendingar höldum stundum að hlýnun jarðar færi okkur betra verður og aukna gróðursæld. Skógarnir vaxi hraðar, græna beltið færist norðar. Bóndinn á Ketilsstöðum í Hjaltastaðarþinghá slær eins konar þriðja slátt í október og í nóvember sést nýútsprungin bláklukka gægjast undan húsvegg á Egilsstöðum. En hnattræn hlýnun veldur líka auknum veðuröfgum og þær eru þegar farnar að knýja að dyrum.
14.jan. 2017 - 20:00 Austurland

Gunnar er fréttafíkill: Byrjaði að gefa út sín eigin blöð innan við tíu ára gamall

Gunnar Gunnarsson er ýmsum störfum hlaðinn, en þekktastur er hann Austfirðingum vegna starfa sinna sem ritstjóri Austurgluggans og Austurfréttar. Hann er formaður Ungmenna – og Íþróttasambands Austurlands, en lærði stjórnmálafræði í Háskóla Íslands og stundaði einnig meistaranám þar í umhverfis- og auðlindafræði.
14.jan. 2017 - 17:00 Austurland

Rúmar 9000 krónur lítrinn af bruggi

Héraðsdómur Austurlands dæmdi í liðinni viku karlmann á sjötugs aldri til fjársektar fyrir að hafa reynt að brugga 95 lítra af krækiberjavíni. Dómurinn lagði ekki trúnað á þann framburð að fyrir kunnáttuleysi hafi saftgerð misheppnast. Nafnlaus ábending er sögð hafa leitt til húsleitar en húsráðandi og unnusti hennar, eigandi gerjaða vökvans, voru erlendis þegar lögregluaðgerðin fór fram í mars árið 2015.
13.jan. 2017 - 07:00 Arnaldur Máni Finnsson

Meira af því sama?

Um leið og ég óska lesendum hamingju- og vonarríks árs þá virðist manni ljóst að dramatík ársins 2016 er ekki gengin yfir. Kallað var eftir uppgjöri sem ekki hefur orðið, enda er það svo að þó áramótum fylgi tímamót þá dugar nýárshugarfarið okkur fæstum mjög lengi. Það er hollt að strengja ýmis heit en um leið varhugavert að lemja sig niður fyrir að standa ekki við óraunhæf markmið.
12.jan. 2017 - 07:00 Austurland

Reiður, gamall maður

Ég ætti að vera latur og værukær. Ég er kominn á sextugsaldur, er í góðri stöðu og á fallegt heimili. Ég á meira að segja barnabörn. Ég ætti að vera vaxinn upp úr hlutverki reiða, unga mannsins. Eftir öll þessi ár finnst mér ég eiga það inni að fá að slaka á og láta yngri kynslóðum eftir eldmóðinn og hugsjónirnar til að breyta heiminum.
28.des. 2016 - 16:00 Austurland

Ný menningarstefna á Fjörðunum

Allt þetta ár hefur mikil vinna farið í það innan stjórnsýslu Fjarðabyggðar að koma á koppinn nýrri menningarstefnu, Lengi býr að fyrstu gerð. Fjölmargir aðilar hafa komið að mótun hennar en innan bæjarfélagsins eru auðvitað mörg söfn, en einnig Sköpunarmiðstöðin á Stöðvarfirði og Tónlistarmiðstöð Austurlands á Eskifirði.
19.des. 2016 - 18:00 Austurland

Hollvinasamtökin aldrei nauðsynlegri

Í janúar á næsta ári verður Umdæmissjúkrahúsið í Neskaupstað 70 ára en það tók til starfa árið 1957. Sigurður Rúnar Ragnarsson formaður Hollvinasamtaka F.S.N. segir að á næstu árum sé mikilvægt að viðhalda samkeppnishæfni þess en síðustu ár hafi það sýnt sig að mikilvægt var að Hollvinasamtök störfuðu að því að endurnýja tæki og aðbúnað.
19.des. 2016 - 18:00 Austurland

Kirkjan ómar öll

Ég stend við aðventukransinn og kveiki á fyrsta kertinu, söfnuðurinn syngur „Tenn lys, et lys skal brenne for denne lille jord…“ Þrátt fyrir að vera alveg eftir handritinu er þetta eitthvað svo rangt og ég raula sjálfur „Við kveikjum einu kerti á“ í huganum.
18.des. 2016 - 20:00 Austurland

Stefán lítur sín hundruðustu jól

Stefán Þorleifsson á Norðfirði lítur sín hundruðustu jól í ár en hann ólst upp í Naustahvammi innst í fjarðarbotni Norðfjarðar. Hann er fæddur 18.ágúst 1916 og var fjórði í röð fjórtán systkina. Guðrún Sigurjónsdóttir kona hans lést fyrir þremur árum síðan en hann heldur jól með barnabörnunum í ár og þykir vænst um þann sið að börnin dansi í kringum jólatréð á meðan sungið er.
18.des. 2016 - 17:00 Austurland

Taka það RÓ-lega

Þegar horft er til austfirskrar hönnunar um þessar mundir er óhætt að segja að RoShamBo teymið á Seyðisfirði komi sterkt inn með sinni hönnun á Asparhúsinu í Vallanesi, sem opnað var nú í haust. Ullardýnur og púðar frá teyminu hafa mestmegnis verið til sölu beint frá teyminu eða á sölusýningum en athygli vakti þegar vörur frá þeim voru kynntar í Húsi handanna síðasta laugardag.
17.des. 2016 - 18:00 Austurland

Þankar á jólaföstu

Senn líður að jólum. Tíðin einmuna. Svörður móður jarðar svargulur en tún bænda stappa nærri fagurgrænu. Fíflar hafa sprungið út, hermir fésbók, og þá leiddi ég hugann að þessu; fífl þessir fíflar og fannst ég vera fyndin.
17.des. 2016 - 17:00 Austurland

Smásagnajólin miklu?

Það er mál manna að óvenjumikið af góðum skáldskap komi út fyrir þessi jól hvort sem litið er til ljóða, skáldsagna eða verka af öðrum toga. Eins þykir ánægjulegt að hræringar á bókamarkaði feli í sér breytt landslag – og breitt – þar sem óvenjulegar bókmenntir fái meiri athygli en venjulega.
17.des. 2016 - 07:00 Austurland

Hlutaskáld mótað af Vopnafirði

Vopnafjörður hefur haft ófyrirséð áhrif á hönnunarferil könnuðarins Brynjars Sigurðarsonar. Á lokaári hans í Listaháskóla Íslands árið 2009 gerði hann rannsókn á fagurfræði Vopnafjarðar. Verkefnið hefur leitt hann víða um heim síðan þá en á dögunum snéri hann aftur til Vopnafjarðar á vegum austfirska hönnunarverkefnisins Designs from Nowhere.
16.des. 2016 - 07:00 Arnaldur Máni Finnsson

Patt eða Patti

Við erum stödd í þverstæðu mennskunnar sjálfrar. Tilvistarvandinn er sjaldan áþreifanlegri en einmitt skömmu fyrir jól, lífsverundin öll titrandi af eftirvæntingu og spennu; við verðum að standa okkur. Kannski finnst okkur allt í húfi að nú þurfi allt að ganga upp til þess að hægt sé að halda áfram, en um leið erum við minnt á það að eindreginn vilji er ekki nóg til þess að hlutirnir fari eins og við óskum.
13.des. 2016 - 17:25 Austurland

Jólakortatíðin hefst - Listnemar gera jólakort Hollvinasamtaka

Hollvinasamtök heilbrigðisþjónustu á Fljótsdalshéraði, HHF, hafa gefið út annað og þriðja kortið í röð jólakorta sem prýdd verða listaverkum nema af listnámsbraut Menntaskólans á Egilsstöðum. Kortin eru fjáröflunarverkefni HHF, sem styður sérstaklega við hjúkrunarheimilið Dyngju á Egilsstöðum og heilbrigðisþjónustuna á Héraði og Borgarfirði eystra.
10.des. 2016 - 18:00 Austurland

Svipsterkir hestar Péturs

Á síðustu vikum hefur hinn kunni og ástsæli myndlistarmaður Pétur Behrens kynnt úrvalsbók hestamynda sinna, Hestar, sem hefur að geyma sýnishorn af æviverki hans. Textar fylgja á íslensku, ensku og þýsku. Verkið er glæsilegt í alla staði og eigulegt bæði fyrir listunnendur og hestafólk.
10.des. 2016 - 13:00 Austurland

Ömmu og afabókin mikla

Íris Dóróthea Randversdóttir er lifandi og skemmtilegur penni sem ber auðsýnilega mikla umhyggju fyrir umfjöllunarefni sínu og smitar kæti og ríkulegri elsku út frá sér með sögum sínum af músunum litlu og Músaömmu og afa. Íris er menntuð sem leik- og grunnskólakennari og starfaði um árabil á þeim vettvangi, m.a. á Hallormsstað og í Brúarási á Fljótsdalshéraði.
10.des. 2016 - 09:00 Austurland

Þjónustustarf í þágu hugmynda

Nýr forstöðumaður Menningarmiðstöðvar Fljótsdalshéraðs er Kristín Amalía Atladóttir. Hún tekur við starfinu af Unnari Geir Unnarssyni sem gengt hefur því undanfarin misseri. Kristín hefur verið búsett á Austurlandi í eitt og hálft ár, en segist strax hafa heillast af svæðinu, menningu þess og sögu. Hún sé full tilhlökkunar yfir komandi tímum og hlakkar til að setja sitt mark á stefnu Menningarmiðstöðvarinnar á komandi árum.
09.des. 2016 - 15:30 Austurland

Frá fyrstu línu til þeirrar síðustu

Það ólgar blátt blóð um lófalínur Sigurðar Pálssonar á kápu nýjustu bókar hans, Ljóð muna rödd. Þetta afkastamikla skáld hefur rödd sína enn á ný, starir inn í tómið og óendanleikann og lætur sig dreyma; hlýðir röddum og þreifar á heillagripum, rétt eins og skáldin gera.
08.des. 2016 - 13:23 Austurland

Umsóknareyðublöðin

Um daginn var ég á fundi þar sem fjallað var um sjóð sem ætlað er að styrkja með nokkrum krónum menningarviðburði í landinu. Forstöðumaður sjóðsins sagði frá því, að við síðustu úthlutun hefði stórum hluta af umsóknum verið hafnað með einu pennastriki af því að sótt hafi verið um á gömlum umsóknareyðublöðum. Auk þess kom fram að nýju umsóknareyðublöðin væru svo flókin að tæpast væri á færi annarra en sérfræðinga að fylla þau út. Þess vegna væri afar brýnt fyrir vonina um styrk úr sjóðnum að sækja sér aðstoð fagfólks. Verkefnið sjálft skipti því ekki mestu máli heldur umsóknin.

07.des. 2016 - 17:00 Austurland

Matargagnrýni - Ósinn, Hótel Höfn

Ósinn er elsti heilsárs veitingastaðurinn á Höfn, 25 ára í ár en sjálft hótelið er 50 ára gamalt. Nýir eigendur tóku við Hótel Höfn í vor og er verið að yfirfara staðinn og breyta áherslum en núverandi matseðill var þróaður og unninn af José Vicente Garcia Agullo, sem einnig hefur unnið aðra hótelmatseðla á svæðinu.
05.des. 2016 - 07:00 Austurland

Kúnstin að segja nei

Það eru forréttindi að búa í smábæ en að sama skapi fylgir því mikil ábyrgð.  Smægð samfélagssins gerir íbúum kleift að vera kunnug hvort öðru og aðstoða á marga vegu. Uppáhaldshátíðin mín á Seyðisfirði er 17. júní, þá safnast saman góður hópur fólks og allir eru í rólegheitunum að njóta þeirra viðburða sem eru í boði.
04.des. 2016 - 18:00 Þorgeir Arason

Að gera sér dagamun

Nú er aðventan hafin og biðin mikla eftir hátíðinni sem er í vændum. Þá munum við sennilega öll vilja, þegar hátíðin kemur loks, gera okkur dagamun. Mig langar aðeins að fá okkur til að hugsa um hvað þetta orðtak þýðir, að gera sér dagamun!
04.des. 2016 - 17:00 Austurland

Mynd af þér – mjög ok

Sigurður Atli Sigurðsson opnaði sýningu sína Mynd af þér, í Skaftfelli sl. laugardag. Hann útskrifaðist úr Listaháskóla Íslands árið 2011 og fór í kjölfarið í framhaldsnám til Frakklands. Þar kláraði hann MA frá École Supérieure des Beaux-Arts de Marseille og hefur verið ötull í sýningarhaldi frá útskrift
04.des. 2016 - 12:00 Vesturland

Kirkjuvegur - Óléttudrama

Skemmtifélagið á Vopnafirði telur um 60 manns en húsfyllir var á Aðventusýningu þess annað árið í röð þar sem framhaldsleikritið Kirkjuvegur – að liðnu ári var sýnt við góðar undirtektir. Að sögn Sigurþóru Hauksdóttur verst Skemmtifélagið almennt allra frétta varðandi félagsskapinn þar sem enginn einn ræður för eða svarar fyrir uppátæki þess en þó viðurkennir hún að þær Borghildur Sverrisdóttir haldi utan um hópinn og hafi þróað leikritið og textann.
23.nóv. 2016 - 17:00 Austurland

Stórvirkið Andlit Norðursins hófst í Öræfasveit - Myndir

Á mörgum heimilum hefur eldri gerð Andlita Norðursins verið til, enda kjörgripur. Það er eitt af klassískum verkum Ragnars Axelssonar ljósmyndara. Á dögunum kom út aukin og stækkuð útgáfa verksins og er í henni varpað ljósi á örlög fólksins á myndunum. Saga þeirra er skráð af meiri dýpt í nýja verkinu og er þetta fádæma falleg bók. Fleiri myndir frá hverjum stað fylgja með í viðauka við hverja mynd og texti sem varpar ljósi á myndefnið
23.nóv. 2016 - 11:30 Austurland

Nýsköpunarverðlaun til Óbyggðasetursins

Frá afhendingu verðlaunanna. Óbyggðasetrið í Fljótsdal hlaut nýsköpunarverðlaun Samtaka ferðaþjónustunnar árið 2016 um síðustu helgi en verðlaunin eru veitt ár hvert fyrirtækjum sem bjóða upp á athyglisverðar nýjungar. Markmið verðlaunanna er að hvetja fyrirtæki og frumkvöðla til vöruþróunar og nýbreytni.
20.nóv. 2016 - 14:00 Austurland

Viðræður ganga vel um sameiningu Djúpavogs, Hornafjarðar og Skaftárhrepps

Samræðufundir sveitarfélaganna Djúpavogs, Hornafjarðar og Skaftárhrepps um fyrirhugaða sameiningu hafa gengið vel, að sögn Björns Inga Jónssonar bæjarstjóra á Höfn og gera forsvarsmenn viðræðnanna sér töluverðar vonir um að ná árangri.