Þráir sviðsljósið

Það er óhætt að segja að Steinunni Valdísi Óskarsdóttur, þingmanni Samfylkingar, séu sendar kaldar kveðjur á ritstjórnarsíðu Morgunblaðsins í dag. Þingmaður sem þráir sviðsljósið, er hún titluð þar.

Það er blaðamaðurinn Kolbrún Bergþórsdóttir sem heldur þar um penna og hefur pistilinn með þessum orðum:

„Steinunn Valdís Óskarsdóttir, þingmaður Samfylkingarinnar, hefur upplýst þjóðina um að hún horfi á sjónvarp og sæki þangað hugmyndir. Einn daginn horfði Steinunn Valdís á sjónvarpsstöð og sá yfirheyrslu yfir Tony Blair, fyrrum forsætisráðherra Bretlands, um aðdraganda innrásarinnar í Írak árið 2003. Hún virðist hafa lifað sig mjög inn í það sem hún sá og steig fram með miklum lúðrablæstri og tilkynnti að brýnt væri að rannsaka ákvörðun íslensku ríkisstjórnarinnar um að styðja innrásina í Írak.

Árið 1999 studdi Samfylkingin loftárásir NATÓ á Júgóslavíu en þær voru án samþykkis Sameinuðu þjóðanna. Það var siðferðilega umdeild ákvörðun en því kýs Steinunn Valdís sennilega að gleyma.“

Segir Kolbrún svo að þeir Davíð Oddsson og Halldór Ásgrímsson hafi lýst yfir stuðningi við innrásina í Írak, en „þar hafði vitfirringurinn Saddam Hussein árum saman dundað við að myrða landsmenn sína og brotið gegn öllum samþykktum Sameinuðu þjóðanna.“ Segir hún þetta vissulega umdeilt en í raun smávægilegra en Steinunn Valdís vilji halda fram því þetta hafi einunigs verið já á pappírsblaði sem enginn velti fyrir sér í umheiminum.

„Nú er næsta víst að flestallir óska þess að aldrei hefði komið til innrásar í Írak. En það er engin ástæða til að kalla íslenska ráðamenn til ábyrgðar fyrir að hafa stutt á pappírsbleðli helstu vinaþjóð Íslendinga, Bandaríkin. En þingmaður sem þráir sviðsljósið æpir á nefnd sem á að ræða gamla ákvörðun.

Þingmaðurinn virðist halda að enn sé góðæri á Íslandi og þess vegna hægt að stofna nefnd um mál sem skiptir ekki lengur nokkru máli. Það væri nær að þingmaðurinn beindi þeirri fyrirspurn til ríkisstjórnarinnar hvað hefði orðið um aðgerðina »sláum skjaldborg um heimilin«. Jafnframt ætti þingmaðurinn að leggja til að stofnuð yrði nefnd til að rannsaka af hverju lítið sem ekkert hefur orðið úr fögrum loforðum velferðarstjórnarinnar til hinna skuldsettu þegna. Slík nefnd ætti vitaskuld að starfa fyrir opnum tjöldum og kalla ráðherra í yfirheyrslur þar sem þeir svara fyrir vanrækslusyndir sínar. Beinar útsendingar ættu að sjálfsögðu að vera frá fundum nefndarinnar. Þjóðin myndi taka slíkri nefnd fagnandi, enda væri þar verið að fjalla um mál sem skiptir landsmenn öllu máli.“

Þetta myndu menn kalla breiðsíðu...