Það eina sem konur hafa áhuga á

Jafnréttisbaráttan tók skref aftur um 30 ár í morgun.

Þetta sagði kvenkynsgestur á kaffistofunni og dæsti eftir að hafa skoðað Fréttatímann. Þegar aðrir gestir spurðu hvað væri á seyði, skellti viðkomandi blaðinu á borðið og sýndi þeim hvað við var átt.

Þar blasti við viðtal við tvær fjölmiðlakonur, þær Ellý Ármanns og Þorbjörgu Marínósdóttur sem eru að fara af stað með þátt á Skjá einum. Þetta á að vera þáttur fyrir konur, samkvæmt því sem þær segja.

Til að lýsa þættinum segir Ellý:

Við munum fjalla um allt sem konur hafa áhuga á. Snyrtivörum, útliti, líkamsrækt og svo má auðvitað ekki gleyma kynlífinu.

Og þarna dæsti kaffistofugesturinn aftur og sagði:

Þar hafiði það. Þetta er allt sem við konur höfum áhuga á. Snyrtirvörum, útliti okkar og kynlífi. Er ekki dásamlegt að fá svona yfirlýsingar frá þeim konum sem mest ber á í fjölmiðlum? Jafnréttisbaráttan fékk svo sannarlega kjaftshögg í dag.

...það er eiginlega með ólíkindum að við fáum að láta hugmyndir okkar verða að veruleika í sjónvarpi.