Í tætarann

Útlit er fyrir sögulega viku í íslenskum stjórnmálum og enn er Ögmundur Jónasson í einu aðalhlutverkanna.

Þegar Bjarni Benediktsson, formaður Sjálfstæðisflokksins, varpaði þeirri sprengju inn í þingið skömmu fyrir jólaleyfi að leggja fram tillögu til þingsályktunar um að láta sakamál fyrir Landsdómi gegn Geir H. Haarde fyrrverandi forsætisráðherra niður falla, voru þau síst spöruð stóru orðin. 

Að venju gekk Björn Valur Gíslason, þingflokksformaður Vinstri grænna, harðast fram, en hann sagði þingmenn flokksins ekki myndu ekki leggja ályktun Bjarna lið. Þingsályktunartillagan  sé ígildi þess að afneita hruninu. Hún jafngildi því að setja skýrslu rannsóknarnefndar alþingis „í tætarann“. Málshöfðunin hafi verið ein af þeim aðferðum sem alþingi hafi ákveðið að beita til að gera upp við hrunið, komast að því sem gerðist, hvernig hefði mátt koma í veg fyrir það og hverjir bæru ábyrgð á því. Hann gæti ekki stutt neinar tillögur um að reyna að forða mönnum undan því.

Þetta er rétt að hafa í huga nú þegar Ögmundur Jónasson innanríkisráðherra stígur fram með grein í Morgunblaðinu og lýsir því yfir að hann muni greiða atkvæði með tillögu Bjarna í þinginu næstkomandi föstudag. Áður hafði Guðfríður Lilja Grétarsdóttir þingmaður VG lýst sömu skoðun.

Björn Valur telur þá væntanlega að þar með hafi þau Ögmundur og Guðfríður Lilja afneitað hruninu og sett skýrslu Rannsóknarnefndar Alþingis í tætarann.

Í ályktun sem flokksfélag VG í Reykjavík hefur sent frá sér, segir:

Stjórn Vinstrihreyfingarinnar - græns framboðs í Reykjavík hvetur þingmenn flokksins að vera samkvæmir sjálfum sér og greiða atkvæði gegn þingsályktunartillögu Sjálfstæðisflokksins þess efnis að máli Geirs H. Haarde verði vísað frá landsdómi. Meðferð málsins fyrir landsdómi er mikilvægur liður í uppgjöri þjóðarinnar við m.a. frjálshyggjuna og bankahrunið.

Hér er reyndar athyglisverðari yfirlýsing á ferðinni en margir hefðu haldið. Hér viðurkennir VG nefnilega að réttarhöldin snúist ekki um refsiverða háttsemi einstaklings sem gegndi ráðherradómi, sem er grundvöllur ákærunnar á hendur Geir, heldur koma VG liðar hreint fram og segja að málið sé „uppgjör við frjálshyggjuna“.  VG viðurkennir því hér skýrum stöfum að réttarhöldin séu pólitísk.

Á kaffistofunni sjá menn ótvíræð merki þess að meirihluti sé að skapast á Alþingi fyrir því að samþykkja þingsályktunartillögu formanns Sjálfstæðisfloksins. Búast má við því að mjög muni hitna í kolunum næstu daga vegna málsins, enda telja ýmsir í stjórnarliðinu að ríkisstjórnin sé búin að vera ná slík niðurstaða fram að ganga...