Átti Össur að éta bréfin?

Átti Össur að éta bréfin? spyr Andrés Magnússon. Mynd: Pressan/Gunnar

Það eru ekki ný tíðindi að Össur hafi átt stofnfé í SPRON, það hefur margoft komið fram og hann upplýsir sjálfur á Pressunni í dag að hann hafi eignast þau sem aðstoðarforstjóri Reykvískrar tryggingar seinni part níunda áratugar síðustu aldar og æ síðan tekið þátt í stofnfjáraukningu og litið á þetta sem lífeyrissjóð sinn og fjölskyldu sinnar.

Andrés Magnússon, blaðamaður á Viðskiptablaðinu, er einhver þekktasti hægri maður landsins og ekki beinlínis þekktur fyrir að vera einhver sérstakur stuðningsmaður ráðherra Samfylkingarinnar, nema síður væri. Andrés fjallar um þessi mál á Fésbókinni í dag og skrifar:

Er þetta kannski íslenska heilkennið? Að hneykslið sé að ráðherra skuli ekki hafa tapað? Áður hafði hann sætt gagnrýni fyrir að eiga hlutinn, svo Össur seldi áður en bréfin voru skráð á markað (en hann hafði tekið við ráðherradómi nokkrum vikum áður) og þá er það líka gagnrýnt. Hann var ekki innherji í neinum skilningi..., svo ekki er það málið. En hvað átti karlgreyið að gera, svo öllum líkaði? Éta bréfin?

Nokkrir vinir og félagar Andrésar fjalla í kjölfarið um málið og einn þeirra, Þórarinn Stefánsson netfrömuður með meiru, bætir við:

Davíð Scheving Thorsteinsson lýsti þessu svo vel; Ef þú tapar ertu aumingi, ef þú græðir ertu þjófur.