Ármann: The Accidental Billionaire

Á kaffistofuna hefur nú borist vinnuheitið á bókinni sem Ármann Þorvaldsson, fyrrverandi forstjóri Kaupþings Singer & Friedlander í London, situr nú sveittur við að skrifa.

Ármann, eða Manni eins og hann er gjarnan kallaður, hefur gert samning um útgáfu bókarinnar í Bretlandi, en þar var bankinn undir hans stjórn afar umsvifamikill á seinustu árum og ekki síst frægur fyrir að sinna þörfum ríka og fína fólksins, eins og það er kallað. Líklegt má telja að í þann heim sæki bókarhöfundur titil hinnar nýju bókar, en hann er The Accidental Billionaire.

Ekki er þó ljóst hvort um endanlegt heiti bókarinnar er að ræða, en þetta er að minnsta kosti vinnuheiti hennar.

Verður án efa fróðlegt að lesa um uppbyggingu bankans og störf Ármanns fyrir Kaupþing í bókinni, en ekki síður skemmtisögur sem munu vera margar af samskiptum hans við marga af frægustu milljarðamæringum veraldar.

Gert er ráð fyrir að bók Ármanns komi út síðsumars eða í haust...