Ákveðið á fundi í New York

Ólafur var á launum hjá Mogganum á þriðjudag en Fréttablaðinu í gær. Pressan

Ráðningin mun hafa komið algjörlega flatt upp á forsvarsmenn Árvakurs, enda starfslokasamningur við Ólaf enn í fullu gildi og hann enn á fullum launum hjá félaginu og með tiltekin fríðindi, t.d. enn á bíl í eigu Morgunblaðsins er hann skrifaði undir ráðningarsamning við aðalkeppinautinn.

Telja eigendur Morgunblaðsins því um augljóst samningsbrot að ræða af hálfu nýs ritstjóra, enda þótt ólíklegt sé að þeir muni fara eitthvað lengra með það mál, enda myndi það vera túlkað sem veikleikamerki af þeirra hálfu í komandi samkeppni. Morgunblaðið taldi sig enda ekki geta notað starfskrafta Ólafs og hvers vegna ættu þá ekki aðrir að mega það?

Ólafur hefur sjálfur viðurkennt að starfslokasamningurinn hafi enn verið í fullu gildi er hann skrifaði undir samninginn við Ara Edwald, útgefanda Fréttablaðsins, en við það hafi hann fallið úr gildi. Hann líti svo á að þar með afsali hann sér frekari greiðslunum og hlunnindum sem hann hafi notið eftir uppsögn sína.

Ákveðið á fundi í New York

Á kaffistofunni er fullyrt að ráðning nýs ritstjóra Fréttablaðsins hafi átt sér nokkurn aðdraganda, enda þótt hún hafi endanlega verið ákveðin á fundi þeirra Ara Edwald, forstjóra 365 miðla, og hjónanna Ingibjargar Pálmadóttur (stjórnarformanns fyrirtækisins) og Jóns Ásgeirs Jóhannessonar í New York síðastliðinn föstudag.

Með Ara og Ólafi hafa löngum verið vinátta og kærleikar; Ari réð Ólaf á sínum tíma til Samtaka atvinnulífsins og saman unnu þeir í stjórn Heimdallar í formannstíð Ólafs í þeim samtökum. Þeir sem gerst þekkja til rekstrarmála á kaffistofunni segja að Ari hafi að undanförnu lyft grettistaki í hagræðingu og sparnaði innan vébanda 365 og náð fram umtalsverðum árangri. Hann hafi tekið við fyrirtækinu (eða fyrirrennurum þess) í afleitu ásigkomulagi eftir eyðslufyllerí og misheppnaðar fjárfestingar og tilraunir á borð við Sirkus, NFS og prentsmiðjurekstur í útlöndum, og markvisst unnið að því að sníða því stakk eftir vexti.

Helstu vandræði fyrirtækisins undanfarin ár hafa stafað af óbærilegri greiðslubyrði af erlendum lánum félagsins sem m.a. má rekja til Fjárfestingafélagsins Dagsbrúnar og kaupa á ýmsum fyrirtækjum, t.d. Kögun, Skífunni, Saga film og fleiri félögum.

Liður í þeirri viðleitni var uppskipting gamla 365 í fleiri fyrirtæki, t.d. Íslenska afþreyingu sem er komin í gjaldþrot og Rauðsól sem hefur nú fengið nafnið 365 miðlar. Margt af þeim gerningum var umdeilt og hefur skiptastjóri Íslenskrar afþreyingar áhuga á að fá einhverjum gerningum rift, ef þess reynist kostur. En Ari hefur ásamt Jóni Ásgeiri Jóhannessyni haft allar klær úti til að ná í nýtt hlutafé og svo virðist að það hafi tekist; í það minnsta var tilkynnt um að afborganir upp á ríflega milljarð króna á þessu ári væru nú tryggðar á nýlegum hluthafafundi í fyrirtækinu.

Hvar þeir félagar, Jón Ásgeir og Ari, hafa fengið það fjármagn, liggur ekki fyrir. Var það fengið að láni, eða eru nýir meðeigendur komnir að félaginu? Og ef svo er, þá hverjir?