Afmælisveisla ársins

Stórmeistarinn Margeir Pétursson er að verða fimmtugur.

Þá verður Margeir Pétursson, stórmeistari í skák og stjórnarformaður MP Banka, nefnilega fimmtugur og hefur af því tilefni verið boðið til mikillar afmælisveislu í Sunnusal Hótel Sögu.

Mikið hefur gengið á hjá Margeiri upp á síðkastið; banki hans sinnir nú einstaklingsþjónustu í bankaviðskiptum og lifði af fjármálahrun flestra annarra bankastofnana hér á landi og er nú í sóknarhug. Í dag flytur MP Banki einmitt höfuðstöðvar sínar úr Skipholtinu og í Ármúlann, þar sem SPRON var áður til húsa.

Margeir er varkár maður og skynsamur og hefur það áreiðanlega fleytt honum langt. Hann er heldur ekki þekktur fyrir að berast mikið á. Fræg er sagan af því þegar MP opnaði aðalskrifstofur sínar í Skipholtinu og bauð til samsætis þar af því tilefni.

Fjölmennt var í veislunni og áberandi fólk úr viðskiptalífinu og stjórnmálum meðal gesta. Þar kemur að gestir fara að dásama húsbúnað og innréttingar, sem augljóslega hafa kostað skildinginn; eru úr massívum viði af bestu tegund og allt hið vandaðasta.

Loks hefur einn gesturinn sig í það að spyrja Margeir, hvort hér sé ekki hátt spenntur boginn hjá litlu fjármálafyrirtæki að innrétta skrifstofuhúsnæðið svo glæsilega, augljóslega fyrir tugi milljóna króna?

Margeir hugsar sig um og svarar svo glottandi:

Ja, það er nú svo merkilegt að við höfum engu breytt hér eftir við að tókum við húsnæðinu. Innréttingarnar og húsbúnaður er allur frá fyrri eiganda sem var Verkalýðsfélagið Dagsbrún (sem síðar varð Efling).

Var ekki frekar rætt um bruðl í rekstri fjármálafyrirtækja við þetta tilefni...