Íslenska landsliðið á leið í EM í áströlskum fótbolta: Markmiðið að tapa ekki öllu

Íslenska landsliðið í áströlskum fótbolta er eitt þeirra fimmtán sem staðfest hafa komi sína á Evrópumótið í Króatíu í haust. Landsliðseinvaldurinn segir að ekki hafi verið erfitt að velja í liðið. Hann segir bjartsýni ríkja í hópnum.

„Við byrjuðum bara í vor þannig að það var auðvelt að velja í liðið. Allir sem vilja geta komið með, svo lengi sem þeir hafi efni á flugfarinu til Króatíu,“ er haft eftir Friðgeiri Ásgeirssyni á vefnum worldfootynews.com, sem sérhæfir sig í umfjöllun íþróttina. „Við höfum gert hvað sem við getum til að fá styrktaraðila en það á enginn pening (eða það segja þeir) eftir efnahagshrunið.“

Íslendingarnir fara út með átján manna hóp. Flestir þeirra eru Íslendingar en tveir hafa tvöfalt ríkisfang. Fram kemur að í viðtalinu við Friðgeir að besti maður íslenska liðsins sé Páll Finnson, fyrirliði Frakklandsmeistara Paris Cockorels. Hann hefur einnig orðið danskur meistari auk þess að vera í forsvari fyrir dönsku deildina og í danska landsliðinu.

Friðgeir segir að leikmennirnir verði sáttir svo framarlega sem þeir tapi ekki hverjum einasta leik. „Við höfum fulla trú á að við höfum gott lið. En við verðum líka að vera raunsæir og þar sem við höfum ekki getað spilað neina æfingaleiki verðum við mjög ánægðir með tvö eða þrjá sigra.“

Greininni lýkur á þeim orðum að auglýsingaplássið framan á íslensku treyjunum sé enn laust fyrir áhugasaman styrktaraðila.

Evrópukeppnin fer fram í Samobor í Króatíu fyrstu helgina í október. Meðal þeirra þjóða sem hafa boðað komu sína á mótið í ár eru smáþjóðir eins og Katalónar og Andorrabúar en einnig hefðbundnari stórþjóðir eins og Frakkland, England, Þýskaland, Spánn og Tékkland.

Samkvæmt alfræðiritinu Wikipediu fer leikurinn fram á sporöskjulaga velli, oft gömlum krikketvöllum og markmiðið er að skora í mörk á sitthvorum enda vallarins. Mörkin eru tvö og hvort fyrir sig er markað af fjórum stöngum, tveimur eiginlegum markstöngum, og tveimur svokölluðum „fyrir aftan“ stöngum. Boltanum má leika bæði með höndum og fótum. Átján leikmenn eru í hvoru liði og er boltinn sem spilað er með svipaður rúgbý-bolta nema aðeins minni og rúnnaðri.