Háttprýði, kurteisi, siðvenjur, umgengnisvenjur og mannasiðir eru nokkur þeirra orða sem nota má um umfjöllunarefni þessa nýja efnisþáttar Pressunar.

Sjálf kýs ég að tala um háttvísi enda tel ég það vera einskonar samnefnari allra þessara orða og lýsa viðfangsefninu best. Hér ætla ég að fjalla um þær skrifuðu en þó mestmegnis óskrifuðu hefir og lögmál sem gilda í samskiptum manna í millum.

Háttvísi er ekki yfirborðsmennska eða snobb, heldur samskiptamáti sem byggir á nokkrum grundvallarreglum; tillitsemi, virðingu og heiðarleika. Allt eru þetta reglur sem langflest okkar læra í bernsku og það sem meira er, þær eiga við í samskiptum um allan heim. Háttvísi mun dýpri en yfirborðsmennska, því hún byggir á þessum mikilvægu gildum, auk þess að vísa til siðgæðis og almennra mannasiða . Háttvísi skyldi maður nota alltaf, bæði hversdags og spari, enda sýnir hún hver maður er í raun, ekki hvað maður þykist vera.

Það á í raun ekki að vefjast fyrir fólki að sýna háttvísi. Hins vegar gera ýmsar ólíkar umgengnisreglur eða siðvenjur fólki oft svolítið erfitt fyrir. Hvaða fatnaður er við hæfi við ólík tækifæri, hvernig skal heilsast og kveðjast, bjóða til veislu, þakka fyrir sig, hvernig skal haga sér við brúðkaup, opinber ræðuhöld, skálaræður, hvernig gjafir eru viðeigandi við ólík tækifæri? Allt er þetta þó bara samansafn af allskyns siðvenjum sem mótast hafa í gegnum tíðina og  eru auðlærðir þeim sem ekki kunna. Það er vel þess virði að leggja á sig að þekkja siðvenjur þess samfélags sem maður lifir og starfar í, enda er hegðan ágætur mælivkarði á innri mann og viðhorf til lífsins.

Á þessari síðu fjalla ég  almennt um háttvísi en þó einkum siðvenjur og almenna mannasiði. Lesendum er velkomið að senda inn fyrirspurnir um efnið og jafnvel álitamál. Ég mun með ánægju leitast við að svara öllum við fyrsta tækifæri.

Með vinsemd og virðingu,
Helena

Þið getið sent mér tölvupóst á hattvisi@pressan.is