Komdu til baka

Hver þekkir það ekki að leika eina holu illa á golfvellinum og láta það fara svo í taugarnar á sér að næstu holur verða einnig slæmar?

Það á að vera gaman í golfi hvort sem um er að ræða hring með kunningjum eða hring í móti, það er því mjög mikilvækt að leikmenn náii að halda haus þó að stundum blási á móti og illa gangi á einhverri holu sem leikin hefur verið. Það er ekkert leiðinlegra en að leika í ráshóp með einstaklingi sem er tuðandi og hendandi kylfum í tíma og ótíma og slíkur leikmaður missir einbeitinguna sjálfur truflar meðspilarana og golfið versnar til muna þegar leikmaðurinn hagar sér á þennan hátt.

Það sem liðið er er búð og gert og það breytir engu þó að leikmaðurinn kasti kylfum í allar áttir eða sparki í pokann sinn það mun ekki hjálpa til við að bæta skorið.

Ég vil hér nefna nokkur atriði sem allir ættu að hafa til hliðsjónar þegar leikið er golf og illa gengur.

1. Gleymdu því sem liðið er, þá sérstaklega lélegu höggunum sem koma reglulega hjá öllum sama hversu góður leikmaðurinn er og einbeittu þér sem best að næsta höggi.

2. Ef slegið er lélegt högg er mikilvægt að gera það upp afhverju þetta gerðist, setja svo kylfuna í pokann , brosa og halda svo áfram í næsta högg með jákvætt hugarfar.

3. Hrósa meðspilurum fyrir góð högg þó að illa gangi hjá manni sjálfum

4. Ef þú færð „sprengju“ á eina brautina settu þér þá markmið á næsta teig td. Nú fæ ég tvö pör í röð og kem mér í gang. Og alls ekki fara að hugsa um „sprengjuna „ og tala neikvætt við sjálfan þig. Við breytum engu í fortíðinni.

5. Ef þú slærð lélegt högg td. í glompu og nærð ekki boltanum upp, ekki rjúka í að slá næsta högg í einhverri fýlu heldur taktu þér tíma í næsta högg og er jafnvel ágætt að ganga aðeins út úr glompunni á milli högga.

6. Vertu með „pokerface“ á golfvellinum og haltu jafnaðargeði í gegnum hringinn hvort sem að vel eða illa gangi. Ekki haga þér eins og hjartalínurit.

7. Einbeittu þér þegar að þú slærð og síðasta hugsun fyrir höggið á að vera jákvæð td. „ Þetta verður svo gott högg“ með því komast á meðan ekki neikvæðar hugsanir að.

8. Það er ekki hægt að leika golf án þess að slá einhver léleg golfhögg á hringnum og það er eitthvað sem við verðum að sætta okkur við.“Golf is not a game of perfect“

9. Einbeittu þér að einu höggi í einu, ekki hugsa um næstu brautir eða næstu högg bara að því verkefni sem snýr að þér hverju sinni.

10. Hafðu gaman að þessu , þetta er bara leikur.

Með bestu kveðjum
Brynjar Eldon Geirsson
PGA golfkennari hjá golfskóla ProGolf