17. jan. 2011 - 09:00Gunnar Már Sigfússon
Það eru nú bara þannig að sum ráð eru betri en önnur. Eftirfarandi listi er yfir þau ráð sem tengjast líkamsrækt kylfinga og okkur finnst standa upp úr og eru frá virtustu þjálfurum kylfinga um allan heim. Þetta eru allt frábærarar ráðleggingar sem við höfum tekið saman og mælum með að fylgið og uppskerið ykkar besta sumar til þessa.
# 1 Undirbúningurinn verður að hefjast löngu áður en þú ferð á völlinn
Finnst þér stundum eins og líkaminn hafi bókstaflega gefist upp á miðjum hring. Ef líkaminn er ekki í topp standi getur hann ekki flutt súrefni til vöðvanna nógu fljótt sem þýðir að mjólkursýra safnast upp þegar þú ferð að nýta vöðvana í höggunum og sýra og þreyta safnast upp og niðurstaðan verður.... ja við skulum bara segja ekki þinn besti hringur! Að hefja undirbúningstímabilið tímanlega með réttri líkamsrækt er lykillinn ásamt góðri upphitunarrútínu sem þú framkvæmir fyrir hringinn. Upphitun verður að vera þaulhugsuð og innihalda dýnamískar teygjur sem raunverulega búa líkamann undir átökin.
# 2 Hvað þarf til þess að þú verðir betri kylfingur?
Hefurðu spurt sjálfan þig þessarar spurningar? Þetta er spurning sem þú verður að spyrja sjálfan þig að og setjast síðan yfir svarið og skilgreina þau atriði sem þú setur niður á blaðið. Þetta er klukkustund sem þú munt aldrei sjá eftir. Það sem skilur á milli þeirra sem skara framúr og hinna er að þeir hafa fyrir löngu sett upp sinn lista og hann inniheldur sennilega ekki fleiri en 4 atriði. Hvað þarf til þess að þú verðir betri kylfingur?
# 3 Greindu veikustu hlekki líkamanns og leggðu áherslu á þá
Líkaminn er það sem sveiflar kylfuhausnum á yfir 150 km hraða í átt að kúlunni og það eru yfir 400 vöðvar sem taka þátt í ferlinu svo það eru margt sem þarf að ganga upp og vera í lagi ef vel á að takast til. Þú getur æft í þrjá tíma á dag og slegið 500 bolta með golfkennaranum þínum annan hvern dag en það mun ekki skipta nokkru máli ef þú ert að glíma við líkamlegan annmarka. Það er ekki hægt að gera eitthvað sem er líkamlega ómögulegt en góðu fréttirnar eru að langflest er hægt að laga og restina er hægt að stórbæta gegnum líkamsgreiningu og rétta æfingaráætlun.
# 4 Útilokaðu 70% af algengustu sveiflu-mistökum kylfinga
Settu þig í golfstöðu og án þess að nokkur hreyfing komi frá neðri líkama eða mjöðmum skaltu lyfta hægri hendinni upp eins og þú sért að halda á bakka og settu hana eins aftarlega og þú getur án þess að finna til óþæginda eða reyna mikið á þig. Taktu kylfuna í vinstri hönd og sameinaðu hana hægri. Þetta er aftursveiflan þín og það að stoppa hér í stað þess að þvinga axlirnar aftur útilokar yfir 70% af algengustu sveiflumistökum sem leiða til slakra högga.
# 5 Hugaðu að heilsunni á allan mögulegan hátt
Það eru þrjú atriði sem verða að vera inn í rútínunni þinni ef þú vilt upplifa sanna heilsu, heilbrigði og vellíðan hvort sem hún er líkamleg eða andleg. Svefn er oft vanmetinn hluti af heildinni en skiptir gríðarlega miklu máli. Líkaminn endurnýjar sig í hvíldinni og viss uppbygging og hormónaflæði fer ekki í gang nema góðri hvíld sé náð. Ónæg hvíld, stress og röskun á svefni hefur mikil áhrif á daglegt orkuflæði hjá okkur og er talin ýta undir fitusöfnun og gera okkur veikari fyrir sýkingum hvort sem um ræðir venjulega kvefpest eða verri veikindi.
Mataræði og næring skipta miklu máli og það eru þrjú atriðið sem þú þarft að hafa í huga varðandi matinn. Borðaðu reglulega. Hámark 3 tímar á milli máltíða/millimáltíða. Settu ávallt saman góða blöndu af öllum næringarefnunum kolvetnum, próteinum og fitu í hverja máltíð ef þú getur. Passaðu skammtastærðirnar. Hreyfing er það atriði sem lokar þessum hring og hún þarf að vera reglulega og hún þarf að vera skemmtileg svo þú haldist í rútínunni. Golfið er sérhæfð íþrótt svo líkamsrækt kylfinga þarf að vera sniðin að þeirra þörfum og vera persónugerð að þér og þínum líkama.