Twitter: Samskiptatæki útvalinna sem almenningur er ekki að skilja og ekki að nota!

Æ fleiri virðast nýta sér samskiptatólið Twitter til að koma skilaboðum sínum á framfæri en erlendir fjölmiðlar segja hins vegar að það sé lítill hópur útvalinna. Almenningur sé hins vegar engan veginn að skilja þessa tækni og noti hana því ekki.

Þannig hafa fjölmiðlar æ oftar fengið fréttir og upplýsingar um skoðanir eða framferði fræga fólksins og áhrifamikilla einstaklinga í gegnum Twitter.  Twitter sé þrátt fyrir það ekki útbreiddara en svo að yfirgnæfandi fólk sem skilji og noti Facebook viðurkenni að átta sig alls ekki á hvernig Twitter virki, þrátt fyrir að hafa prófað það.

Samkvæmt norsku rannsóknarstofuninni SINTEF er mun meira gert út Twitter í fjölmiðlum en efni standa til. Petter Bae Brandtzæg, hjá SINTEF telur notendur Twitter vera útvalinn hóp.

„Rannsóknir sýna að þeir sem nota Twitter eru oft með mikla menntun. Meðal notenda eru margir fréttamenn og þeir sem vinna mikið með slík samskiptatæki.“

Brandtzæg telur hins vegar að vægi Twitter muni aukast, ekki síst þar sem það séu einmitt álitsgjafar og áhrifavaldar sem noti það.

„Þeir nota Twitter til að koma sínu á framfæri og þeir gera það með áhrifaríkum hætti. En þó notendahópurinn stækki áfram munu þeir aldrei ná sömu vinsældum og Facebook.“

Hann segir að Facebook sé fyrir hinn almenna borgara, nokkuð sem Twitter verði aldrei. Hann segir mjög marga alls ekki átta sig á hvernig nota eigi Twitter eða hver tilgangurinn sé eiginlega. Takmörkun á stærð skilaboðanna sé líka hindrun fyrir marga.

Norska ríkissjónvarpið gerði könnun meðal 500 einstaklinga og voru þeir beðnir um að lýsa Twitter með einu orði.  Óþekkt, óspennandi og leiðinlegt, voru algengustu svörin.