Fjölmargir Íslendingar vilja ókeypis vikuferð til Kanaríeyja: Frekar mikil áskorun

Það hefur líklega ekki farið framhjá neinum að hér er staddur hress hópur ungra Spánverja að kynna Kanaríeyjar fyrir þjóðinni. Um hundrað Íslendingar fá ókeypis draumaviku á eyjunum og hafa nokkrir nú þegar farið í gegnum prufur.

Ætlunin er að ferðalangarnir eigi ógleymanlegt frí þar sem boðið er upp á vatnsíþróttir, eldfjallaskoðun, fjölskylduferðir og heilsudekur.

En hvaða Íslendingar komast með?  

Guðlaugur Bergmann tók þátt í prufunum:

„Þetta var frekar mikil áskorun. Það fóru 20 Íslendingar inn í sal í einu og settust á móti jafnmörgum spænskum dómurum. Viðtölin stóðu í eina mínútu svo skiptum við um sæti - svona eins og á hraðstefnumóti. Spurningarnar snerust mest um Kanaríeyjar, áhugamálin manns og hvers vegna maður vildi komast með í ferðina.

Þetta var mjög skemmtilegt en ekki laust við að maður væri farinn að svitna aðeins undir lokin, held samt að ég komist með“, segir Gulli og brosir.

Þeir sem ekki verða meðal þeirra hundrað heppnu sem hljóta ferðina ókeypis geta nýtt sér tilboð sem kynnt verður á næstunni.

Í tilkynningu Ferðamálaráðs Kanaríeyja segir:

„Við munum gera öllum Íslendingum tilboð sem þið getið ekki hafnað“.