Þess vegna ættirðu aldrei að borða mat sem fluga hefur komist í snertingu við

Þú ert að gera þig reiðubúinn til að borða þessa girnilegu samloku fyrir framan þig. Skyndilega sérðu flugu sveima yfir matnum, hún lendir á samlokunni en flýgur svo á brott jafn skjótt og hún kom. Líklega læturðu þig hafa það að borða samlokuna, ekki satt?

Samkvæmt nýrri rannsókn vísindamanna við Pennsylvania State University í Bandaríkjunum, Nanyang Technological University í Singapúr og Federal University í Rio de Janeiro í Brasilíu, ætti fólk alls ekki að borða mat sem fluga hefur komist í snertingu við. Flugur bera nefnilega með sér fleiri sjúkdóma og pestar en okkur hafði grunað.

Vísindamennirnir skoðuðu örveruflóru 116 flugna af tegund maðka- og húsflugna um víða veröld. Samkvæmt niðurstöðunum má finna nokkur hundruð tegundir af bakteríum á löppum og vængjum meðalflugunnar, stundum minna en stundum meira. Þessar flugur hafa stundum komist í snertingu við allskonar ófögnuð; saur, hræ af dýrum eða úrgang af einhverju tagi.

Bakteríur sem flugurnar taka með sér eiga svo auðvelt með að smitast á annað yfirborð, til dæmis mat. Í niðurstöðum vísindamannanna kemur fram að flugur séu einskonar loftskutlur fyrir bakteríur og í raun hið fullkomna farartæki fyrir bakteríur að dreifa úr sér.

Ein tegund bakteríu sem vísindamennirnir fundu heitir Helicobacter pylori, sem getur valdið magabólgum og magasári. Það hversu mikið magn baktería er að finna á flugum fer að nokkru leyti eftir því umhverfi sem þær dvelja í; þannig voru að jafnaði fleiri skaðlegar bakteríur á flugum sem veiddar voru í borgum en flugum sem veiddar voru á strjálbýlum svæðum.

Lærdómurinn af þessari rannsókn er samt sá að húsflugur eru ekki eins saklausar og margir halda.