08. feb. 2010 - 07:00
Egill Drillo Olsen, þjálfari Noregs, Carlos Queiroz, þjálfari Portúgals, Morten Olsen, þjálfari Danmerkur og Ólafur Jóhannesson, þjálfari Íslands, við dráttinn í undankeppni EM 2012 í Varsjá í gær.
Forráðamenn danska, norska og portúgalska landsliðsins hafa ekki miklar áhyggjur af því að litla Ísland nái árangri á Em í knattspyrnu en dregið var í riðla í gær. Flestir telja að Ísland lendi í neðsta sæti H-riðils.
Carlos Queiroz, þjálfari Portúgals, sagði eftir dráttinn að hann væri afar ánægður með niðurstöðuna. Norðmenn gætu komið á óvart en það væru Danir sem yrðu helsta ógnin. Af öðrum þjóðum þyrfti ekki að hafa áhyggjur.
Egil „Drillo“ Olsen, þjálfari Noregs, sagðist himinlifandi yfir árangrinum. Nú yrði hægt að hefna þess óréttlætis sem varð þegar Ísland náði 2 - 2 jafntefli í Noregi og 1 - 1 á Íslandi í undankeppni HM. Til að tryggja að Noregur kæmist áfram yrði að tryggja að Ísland fengi ekki stig frá Noregi. Hann segist viss um að baráttan um annað sætið verði milli Danmerkur og Noregs, önnur lið [lesist: Ísland og Kýpur] eigi ekki möguleika.
Morten Olsen, þjálfari Dana, hefur þegar kortlagt riðilinn og veit upp á hár hvernig hann fer. Portúgal vinnur en Olsen er sannfærður um að Danir komist áfram.
„Danmörk lendi í öðru sæti. Norðmenn verða númer þrjú, Kýpur fjögur og Ísland verður í fimmta sæti. Við hlökkum til leiksins á móti Noregi.“
Morten Olsen minnir ennfremur á að Íslandi hafi ekki unnið Dani síðan í þýðingarlausum vináttulandsleik árið 1974 og það breytist ekki nú. Hann segir að auki gjarnan vilja hefja undankeppnina með sigri með því að spila fyrsta landsleikinn í Laugardal.
Sem sagt; þjálfarar Portúgals, Danmerkur og Noregs, hafa þegar afskrifað litla Ísland í undankeppni EM 2012.