Tölvunördar í Valhöll náðu félagatali Samfylkingarinnar

Ungir og ákafir menn nýttu sér glufu í kosningakerfi, skrifuðu lítið tölvuforrit og létu síðan mjög harðvirka tölvu bera allar kennitölur á þjóðskrá saman við netkosningu í prófkjöri Samfylkingarinnar. Fyrir vikið er eintak af flokksskránni í Reykjavík og Suðvesturkjördæmi í höndum tölvunörda Valhallar.

Þetta kemur á bloggsíðu Páls Ásgeirs Ásgeirssonar blaðamanns, en hann fjallar um orðróm sem hefur verið í gangi um félagaskrá Samfylkingarinnar hafi verið hlaðið niður af óviðkomandi aðilum. Egill Helgason gerði málið að umtalsefni í þættinum Silfur Egils á sunnudag og spurði: „Hverjir skyldu hafa hlaðið niður félagaskrá Samfylkingarinnar“. Hann bætti við: „Ég hef á tilfinningunni að það hafi verið hægt að gera það og hef heimildir fyrir því.“

Fjallað er um málið á vefritinu Herðubreið í dag og segir þar:

Egill hefur að vísu ekki alltaf fyrir því að kynna sér staðreyndir áður en hann slær fram vafasömum fullyrðingum, svo að þetta ætti ekki að koma á óvart.

Líklega er hann að vísa til þess að á einhverjum tímapunkti var hægt að komast að því hvort tiltekinn einstaklingur var á kjörskrá í prófkjöri og hvort hann væri búinn að kjósa. Það var alvarlegur ágalli á kerfinu – og einn vandinn við kosningar á netinu – en hvergi var hægt að nálgast félagaskrána í heild.

Egill hefði getað slegið inn hvaða kennitölu sem var og komist að því hvort viðkomandi væri kjörskrá. Ef viðkomandi var búinn að kjósa hefði líka komið melding um það enda ekki hægt að kjósa tvisvar.

Þetta var ágallinn. Félagaskrána í heild var hins vegar hvergi að finna á netinu og hana gat enginn sótt.

Hvað sem heimildum Egils Helgasonar líður.

Nú hefur Páll Ásgeir semsé tekið undir með Agli og segir:

Það sem mun hafa gerst er að ungir og ákafir menn skrifuðu lítið tölvuforrit og létu síðan mjög hraðvirka tölvu bera allar kennitölur á þjóðskrá saman við netkosninguna. Með því að tölvan gaf ávallt til kynna hvaða kennitölur væru á félagaskrá Samfó eða ekki varð smátt og smátt til listi yfir þá sem fengu “grænt ljós”. Jafnframt komu fram upplýsingar um það hvort viðkomandi hafði þá þegar kosið þegar þessi samkeyrsla fór fram.

Til verksins mun þurft nokkra kunnáttu í forrritun, mjög öfluga tölvu, tölvutæka þjóðskrá og tæplega tvær klukkustundir sem samkeyrslan tók. Þetta var semsagt gert meðan umrædd glufa í kosningafyrirkomulaginu var enn opin.

Og hvað?

Félagaskrá Samfylkingar í Reykjavík og Suðvesturkjördæmi er  í höndum einhverra sem að jafnaði fengju ekki aðgang að henni. Og hvað með það? Á ekki allt að vera uppi á borðinu, gegnsætt og allt.

Ég get ómögulega séð að það steðji einhver sérstök hætta að flokksstarfi Samfylkingar þótt eintak af félagaskránni í Reykjavík og Suðvesturkjördæmi hafi lent í hendur á tölvunördum Valhallar.