07. feb. 2010 - 11:46
Einar K. Guðfinnsson, þingmaður Sjálfstæðisflokksins segir ekki rétt að segja að þjóðin eigi að ráða fiskveiðikvóta, það séu aldrei ríflega 300.000 manns sem muni veiða hann. Það sé hins vegar mikilvægt að sem flestir njóti verðmæta hans. Guðbjartur Hannesson minnti á að bæði Samfylkingin og Vinstri græn hafi lofað fyrir síðustu Alþingiskosningar að innkalla aflaheimildir og úthluta á ný, fara svonefnda firningarleið.
Guðbjartur ræddi um starfshóp sem hafi verið skipaður af sjávarútvegsráðherra, til þess að endurskilgreina og setja markmið innan geirans til lengri tíma. Þetta kom fram á sérstökum borgarafundi um sjávarútvegsmál á Bylgjunni í morgun. Fyrir utan þá Einar og Guðbjart voru Grétar Mar Jónsson, fyrrum Alþingismaður og Friðrik J. Arngrímsson, framkvæmdastjóri LÍU gestir en þeir ræddu um ástand sjávarútvegsins og firningarleið sem stjórnvöld hafa boðað. Grétar Mar sagði að hraða þyrfti fyrningarleiðinni og helst vill hann firna um 25% á ári og byrja í september á þessu ári.
Guðbjartur segir að eftir hrun sé nauðsynlegt að fara í endurmat og viðræður um framtíðarskipulag. Starfshópinn, sem hann ræddi um, skipa fulltrúar helstu hagsmunahópa sjávarútvegsins, en Guðbjartur sagði að eftir þrjá fundi, hafi LÍÚ hætt að sækja þá. Friðrik segir það vera vegna þess að LÍÚ hafi ekki ætlað að útfæra fyrningarleiðina í samstarfi við stjórnvöld.
Um svörtu hliðar greinarnar tókust þeir á um skuldsetningu greinarinnar, t.d. hvað ætti að gera við gríðarlega skuldsetningu innan greinarinnar ef að kvótinn verði tekinn af útgerðarmönnum. Guðbjartur segir það hugmyndina að menn borgi sínar skuldir áfram, en það þurfi að skoða hvernig sé hægt að hjálpa mönnum svo þeir verði ekki skildir eftir á köldum klaka ef kvóti verður endurútgefinn. Einnig var bent á hversu erfitt væri fyrir nýliða að eignast bát og komast að í greininni. Grétar Mar kallar núverandi kerfi gjafakvótakerfi og ríkisstyrk og vonaðist eftir jöfnuði og jafnrétti innan fiskveiðigeirans.
Einar sagði að núverandi kerfi sé tekjumest og Friðrik spurði hvers vegna ætti að breyta því sem vel gengur og kallaði kvótakerfið heilbrigða skynsemi, þar sem það sé nauðsynlegt að takmarka kvótann.