20 hlutir sem þú ættir ekki að kaupa notaða og gætu stefnt heilsu þinni í hættu

Eftir að kreppan skall á hafa æ fleiri freistast eða hreinlega orðið að kaupa notuð húsgögn, föt, sjónvörp og tölvur svo fátt eitt sé nefnt. Í mörgum tilvikum er hægt að gera frábær kaup á nytjamörkuðum eða í Kolaportinu. En suma hluti ætti aldrei að kaupa notaða þar sem þeir geta stefnt heilsu eða öryggi fólks í hættu. Á vefsíðunni Moneytalksnews.com er fjallað um 20 hluti sem ætti aldrei að kaupa notaða. 

Efst á listanum eru vöggur og sérstaklega rimlarúm þar sem mögulegt er að leggja aðra hliðina niður. Upp hafa komið tilfelli þar sem festingar hafa gefið sig og hætta skapast á að barnið gæti dottið úr rúminu eða klemmt sig.  Í öðru sæti eru barnabílstólar. Eftir minniháttar árekstur þar sem enginn meiddist eða loftpúði blés ekki út er óhætt að nota barnabílstólinn aftur en skipta ætti um stól ef um harðan árekstur var að ræða. Afar erfitt er að meta hvort barnabílstóll hafi verið í bíl sem lenti í árekstri svo að ekki borgar sig að taka áhættuna og kaupa hann notaðan. Þar á eftir koma reiðhjólahjálmar. Það sést ekki endilega utan á þeim að þeir séu illa farnir en auðveldara er að greina sprungur á innanverðum hjálminum. Slíkur hjálmur er ekki líklegur til að bjarga þeim sem lendir í slysi.  

Fartölvur eru viðkvæmar en með réttri meðhöndlun ættu þær að endast í fleiri ár. Kaupandi getur þó aldrei vitað hvernig aðrir hafa farið með hlutina sína. Tölvan gætu verið til fyrirmyndar fyrstu vikurnar en gefið upp öndina skömmu síðar. Bestu kaupin eru að verða sér úti um nýja tölvu og fara vel með hana. Það sama gildir um myndbandsupptökuvélar.

Dýnur eru í sjötta sæti. Notuð dýna kemur með allskonar aukahlutum eins og dauðum húðflögum, bakteríum og fleiru sem lesendur ættu ekki að eiga erfitt með að ímynda sér. Góðir skór eru álíka jafn mikilvægir og dýna. Vandamálið við að kaupa notaða skó er að þeir gætu hafa verið frábærir fyrir fyrri eiganda en passa þínum fótum alls ekki. Notaðir skór geta leitt til fót- og bakverkja. Notaðar snyrtivörur eru í áttunda sæti. Þær má stöku sinnum sjá á borðum í Kolaportinu.  Á varalit geta verið bakteríur. Það borgar sig ekki að versla notaðar snyrtivörur og taka áhættuna á að veikjast.

Gömlu túpusjónvörpin endast mun lengur en flatskjáir. Að kaupa flatskjá sem er dottinn úr ábyrgð er alls ekki góð kaup og rándýrt er að láta gera við tækin ef eitthvað kemur upp á.

Hattar eru í tíunda sæti. Í þeim má finna dauðar húðflögur, hár og jafnvel lýs. Hvort sem fólk kaupir nýja eða notaða hatta á alltaf að byrja á því að láta þvo þá eða hreinsa. Sama gildir um sundföt. Ryksugur eru þarfaþing en fyrri eigandi gæti verið búinn að sparka og berja sína nánast til óbóta. Sérstaklega ef það var karlamaður sem var að reyna að losa stífluna.

Í þrettánda sæti eru dekk. Ytra lagið gefur ekki fulla mynd af ástandi dekksins. Notaður hugbúnaður er í því fjórtánda. Þegar keyptur er diskur með forriti eru stundum takmörk fyrir því hversu oft er hægt að hlaða forritinu inn í tölvu. DVD spilarar eru orðnir það ódýrir að ekki borgar sig að kaupa tæki sem hefur verið í eigu annarra.

Fyllt tuskuleikföng fyrir börn ætti alltaf að kaupa ný. Ungabörnum finnst gott að japla á tuskuböngsum og gefur auga leið að gömul óhreinindi eða bakteríur geta skaðað barnið.

Halógen lampar eru í sautjánda sæti. Þeir eru grunaðir um að hafa valdið 350 eldsvoðum og 29 dauðsföllum í Bandaríkjunum. Blandarar eru í átjánda sæti. Notaðir skartgripir og sérstaklega ódýrt skart getur innihaldið nikkel og fleiri efni sem geta haft slæm áhrif á húð.

Í tuttugasta og seinasta sætinu er dýrafóður. Dýraeigendur ættu aldrei að láta freistast að kaupa notað eða gamalt fóður. Pöddur gætu hafa komist í matinn og jafnvel verpt í fóðrið með tilheyrandi ósköpum fyrir dýrið og eigandann.