Mikill viðbúnaður lögreglu vegna forræðismáls: Í dag varð ég vitni að því þegar þrjár litlar stúlkur voru teknar frá móður sinni með valdi

Sigrún Guðmundsdóttir segist hafa orðið vitni að ótrúlegum atburði fyrr í dag þegar lögregla og yfirvöld framfylgdu dómi í forræðismáli íslenskrar móður og dansks föður sem eiga þrjár dætur. Hún sé með tárin í augunum og hugsi til fjölskyldu sem eigi um sárt að binda.

Sigrún er tengd móðurinni í umræddu máli, sem töluvert hefur verið til umræðu í fjölmiðlum eftir að dómstóll í Danmörku dæmdi foreldrunum sameiginlegt forræði, en að lögheimili skyldi vera hjá föður dætranna.

Bleikt ræddi á sínum tíma við móðurina Hjördísi Svan Aðalheiðardóttur, eins og lesa má hér.

Sigrún skrifar um atburði dagsins á fésbókina og hafa aðstandendur móður stúlknanna vakið athygli Pressunnar á málinu:

Þetta er búið að vera erfiður dagur. Ég sit hérna með tárin í augunum og er að reyna að vinna eitthvað. Það er hins vegar erfitt, hugurinn reikar annað. Til fjölskyldu sem á um mjög sárt að binda. Þið sem þekkið mig vitið líka væntanlega að ég hef aldrei áður skrifað svona "status" hér og vonandi á ég aldrei eftir að gera það aftur. En nú er mér einhvern veginn allri lokið.

Í dag varð ég vitni að því þegar þrjár litlar stúlkur voru teknar frá móður sinni með valdi. Svo miklu valdi að það þurfti a.m.k. sjö lögreglubíla og eitt lögreglumótorhjól á staðinn. Lögreglustjórinn í Reykjavík mætti líka á svæðið og þarna voru lögreglumenn vígbúnir eins og sérsveitarmenn (hvort sem þeir voru það eða ekki). Kannski þótti það viðeigandi þar sem faðir þessara litlu stúlkna hefur stundum hrætt þær með lögreglunni. Ekki var þó ógnandi mannskari þarna, aðeins nánustu ættingjar og vinir. Venjulegt, friðsamlegt fólk sem getur samt ómögulega skilið þá mannvonsku sem þarna er í gangi og hvaða hagsmuni er þarna verið að verja. Ekki er að sjá að það séu hagsmunir barnanna sem ríghalda í móður sína og vilja alls ekki fara til föður síns. Þessar litlu stelpur hafa upplifað og eru að upplifa eitthvað sem engin börn eiga að þurfa að upplifa. Við hin skiljum ekki hvað er í gangi, er kerfið okkar, sem ég fyrirfram hélt að væri svo gott, ekki að vernda hagsmuni barnanna? Til hvers eru lög og reglur um réttindi barna, ss. barnalög, barnasáttmáli? Til hvers eru embættismenn og stjórnsýsla sem eiga að vinna að velferð barna? Þarf eitthvað stórslys að koma til, svo þessir aðilar geti beitt sér í þágu barnanna?

En sem sagt börnin voru tekin með valdi og eru nú vistuð hjá ókunnugu fólki, barnaverndunaryfirvöldum, væntanlega þar til þeim verður komið til föður þeirra. Faðirinn er danskur og mætti ekki á svæðið. Hann er að þeirra sögn ofbeldismaður og liggja gögn því til sönnunar, sjúkrahúsvist barns, ljósmyndir og áverkavottorð ásamt fleiru. Það er ástæðan fyrir því að móðirin gerir allt sem hún getur til að vernda börnin. Undir venjulegum kringumstæðum hefði hún gjarnan viljað að börnin myndu umgangast föður sinn. Þetta eru bara ekki venjulegar kringumstæður. Þetta gerðist á Íslandi 29. júní 2012. Allir yfirgáfu vettvang með tárum, líka einstaka lögreglumenn.

Frændi stúlknanna, Stefán Svan, skrifar einnig af þessu tilefni:

Svartasti dagur lífs míns rann upp.
Ég horfi uppá börn systir minnar hrifsuð úr fanginu á henni þar sem henni var haldið niðri af stórum lögreglumanni og engin vill fá að heyra það sem að þau hafa að segja.
Það mættu 7 lögreglubílar, eitt hjól og sérsveitarmenn.
Það er búið að svíkja þessi börn af öllum barnayfirvöldum hér og nú á að senda þær burt úr landi með ofbeldismanni sem að sá ekki einusin...ni sóma sinn í því að mæta á svæðið heldur vill frekar að börnin séu vistuð á hæli.
Stórglæpamenn og morðingjar hafa þann rétt að verja sig en það hafa börnin ekki og ekki móðir þeirra.

Ég hvet ykkur til að láta í ykkur heyra allra barna vegna, þetta er ekki rétt.
Mitt bréf var svona og það má afrita það:
Ég krefst þess að mál barna Hjördísar Svan fái eðlilega meðferð og að börnin fái að tjá sig um hvað þeim hefur verið gert. Það er með öllu óásættanlegt að málið hafi farið þessa braut.

Aðstendur stúlkanna hér á landi hafa sett á laggirnar Facebook-síðu, þar sem er að finna frekari upplýsingar um þetta mál, sjá HÉR.