Leikmaður knattspyrnuliðs ÍA ákærður fyrir grófar líkamsárásir gegn 21 árs stúlku - Hlaut dóm í apríl

Mark Doninger, leikmaður úrvalsdeildarliðs ÍA í knattspyrnu, hefur verið ákærður fyrir tvær grófar líkamsárásir gegn 21 árs stúlku. Hann hlaut fjögurra mánaða skilorðsbundinn fangelsisdóm fyrir líkamsárás í apríl síðastliðnum. Stjórn ÍA ætlar ekki ekki að aðhafast í málinu fyrr en dómsniðurstaða liggur fyrir.

Doninger er 22 ára gamall miðvallarleikmaður og hefur verið lykilmaður í liði ÍA undanfarin tvö tímabil. Hann er Breti og lék áður með unglingaliði Newcastle.

Það er lögreglustjórinn á Akranesi sem gefur út ákæruna sem er í tveimur liðum. Fyrri líkamsárásin var framin á skemmtistaðnum Breiðinni á Akranesi þann 22. maí í fyrra.

Er Doninger ákærður fyrir að hafa kýlt stúlkuna, sem á þessum tíma var kærasta hans, hnefahöggi með krepptum hnefa í andlitið, þannig að hún féll niður á poolborð sem hún sat á. Þá mun hann hafa gert atlögu að stúlkunni fyrir utan skemmtistaðinn síðar um kvöldið, hent henni í götuna, rifið í hár hennar og ýtt henni ítrekað niður þegar hún reyndi að reisa sig við. Við árásina hlaut stúlkan mar og bólgu á kjálkabeini, mar og yfirborðsáverka á hné og fótlegg og tognun á ökkla.

Síðari árásin mun hafa átt sér stað á heimili Doningers 30. október í fyrra. Í ákæru segir að hann hafi ráðist á stúlkuna, rifið í hár hennar, hrist hana og dregið á hárinu inn í svefnherbergi þar sem hann henti henni upp í rúm. Þar settist hann ofan á stúlkuna, sló hana utan undir, tók um munn hennar og nef með þeim afleiðingum að hún átti erfitt með andardrátt. Loks er honum gefið að sök að hafa skallað hana í andlitið þannig að enni hans lenti á munni hennar. Í ákæruskjali segir að stúlkan hafi hlotið ákverka í andliti og hálsi og að blætt hafi úr vörum hennar.

Þess er krafist að Doninger verði dæmdur til refsingar og greiðslu alls sakarkostnaðar.

Þórður Guðjónsson, framkvæmdastjóri knattspyrnudeildar ÍA, segir við Pressuna að forráðamenn félagsins séu meðvitaðir um málið. Það hafi verið rætt innan félagsins og ákæran gefi ekki tilefni til viðbragða að svo stöddu. Segir hann að félagið hyggist bíða dómsniðurstöðu áður en frekari ákvarðanir verða teknar.

Doninger var í apríl síðastliðnum dæmdur í fjögurra mánaða skilorðsbundið fangelsi fyrir sérstaklega hættulega líkamsárás, en hann kastaði bjórglasi í höfuð karlmanns á skemmtistaðnum Gamla Kaupfélaginu á Akranesi í apríl í fyrra. Í dómsorði segir að refsingin falli niður haldi hann skilorð næstu þrjú árin.

Þórður segir að þessi tvö mál séu tengd og ekki hafi komið til álita að láta Doninger fara frá félaginu vegna þessara mála. Um sé að ræða einkamál leikmannsins.