Erna Gunnþórsdóttir var tekin í yfirheyrslu um helgina

Erna Gunnþórsdóttir er á þriðja ári í hjúkrunarfræði við Háskóla Íslands. Hún vinnur einnig við fyrirsætustörf í hjáverkum. Hún hefur haft blendnar tilfinningar til fyrirsætustarfa og hætt oft en byrjað síðan aftur. Erna kom fram á sjónarsviðið fyrir nokkrum árum og var þá þekkt fyrir ögrandi myndir í tímaritum á borð við Bleikt og blátt. Pressan tók Ernu í yfirheyrslu og komst m.a. að því að hún er einlægur aðdáandi History channel og finnst fátt leiðinlegra en persónuárásir á kommentakerfum.

Fjölskylduhagir? Er trúlofuð Óla Rúnari og saman eigum við tvo stráka. Jón Inga sem er 4. ára og Gunnþór sem er tæplega 3. ára.

Menntun/atvinna?

Ég er að hefja mitt þriðja ár í hjúkrunarfræði við Háskóla Íslands. Ég stunda einnig fyrirsætustörf í hjáverkum. Ég hef haft blendnar tilfinningar til fyrirsætustarfa í gegnum tíðina og hef hætt ansi oft og byrjað síðan aftur. Neikvæð gagrýni fylgir því að stunda þessa tegund fyrirsætustarfa sem í dag er nefnd glamúr og hún getur svosem verið réttmæt. Myndir af þessu tagi eru oft alveg „á mörkunum“ og virðist snerta strengi siðapostula samfélagsins.

Uppáhalds Sjónvarpsefni? Ég hef gaman að fræðsluþáttum og er einlægur aðdáandi Discovery channel, History channel og National geographic. Þegar kemur að gamanþáttum þá eru uppáhaldsþættirnir mínir Vampire diaries, Buffy the vampire slayer, Angel og Nurse Jackie. Ég er núna að horfa á Game of thrones en ég verð að viðurkenna að þessi þáttur er ekki enn búinn að fanga aðdáun mína. Mér líður eins og ég sé að horfa á miðaldaútgáfuna af Glæstum vonum.

Leikari? Það er svo mikið til af hæfileikafólki en þeir sem koma fyrst upp í hugann eru Ewan McGregor, Edward Norton og Christian Bale af karlkyns leikurum. Meryl streep og Natalie Portman eru mjög góðar leikkonur.

Rithöfundur? Ég hef lesið mikið í gegnum tíðina og á uppáhalds bækur en ekki uppáhalds rithöfunda. Glerfjallið eftir Aðalstein Ásberg, Skuggi vindsins eftir Carlos Ruiz Zafón, Dýragarðsbörnin eftir Kristjönu F, Ég man þig eftir Yrsu Sigurðar og Ein til frásagnar sem er saga Immaculée Ilibagiz. Þetta eru þær bækur sem koma fyrst upp í hugann þegar ég hugsa um eftirminnilegar sögur.

Bók eða bíó? Ef ég hefði meiri tíma þá væru það bækur en ég er í fullu háskólanámi þar sem ég er alltaf lesandi og með tvö lítil börn. Þá er meira freistandi að fara í bíó þegar maður fær tækifæri til að bregða sér frá. Bíóferð er bæði tilbreyting og afþreying þar sem ég get fjarlægt mig aðeins frá raunveruleikanum. Þegar maður les bækur fær maður að skapa umhverfið í kringum það sem maður les en kvikmyndir gera ekki sömu kröfur, þær í raun mata mann á sýn einhvers annars.

Besti matur?

Nautakjöt, svínabógur, Mcflurry, karmelludýr (frá Góu), hnetusmjör og morgunkorn. Ég er með mikið hömluleysi þegar það kemur að morgunkorni. Það lýsir sér þannig að ég ét allan pakkann þegar ég kemst í það. Ég er mikil dellumanneskja og það er alltaf eitthvað eitt sem ég er með æði fyrir á hverjum tíma. Núna er það lakkrís með marsípani.

Kók eða Pepsí? Pepsí og þá sérstaklega pepsí max.

Fallegasti staðurinn?  

Fegurð fyrir mér eru hughrif og mikilfengleg náttúra fangar mig ekkert sérstaklega. Ég er með mikinn áhuga á eyðibýlum og fer hvert sumar að skoða slíkt. Ég er þá með síðustu ábúendaupplýsingar með mér og upplýsingar um jörðina ef það er til. Ég hef mikinn áhuga á minjum um menningu. Það er svo sérstakt að fara að eyðibýli, tala nú ekki um ef þau eru afskekkt, að ganga inná svæði þar sem einu sinni voru hlátur og líf og nú er bara ekkert nema minningar um það sem áður var. Þetta hrífur mig og þar af leiðandi eru eyðibýli fallegustu staðirnir sem ég fer á.

Hvað er skemmtilegt?  Fjölskyldan mín, saga, fornleifafræði, lífeðlisfræði, teikning, photoshop, list, arkitektúr, útihlaup og líkamsrækt. Ég hef mikinn áhuga á mannslíkamanum og ritrýndum upplýsingum. Ég er á móti bullvísindum og gervifræðum sem varða gervifæðu í formi fæðubótaefna. Sama á við ofstækisáróður sem settur er fram af fólki sem er ekki menntað á þessu sviði og kann ekki að nota heimildir.

Hvað er leiðinlegt? Það er fátt sem mér finnst leiðinlegra en persónuárásir á kommentakerfum. Mér finnst sárt að sjá hvað fólk getur verið tillitslaust. Ég tala nú ekki um þegar það ber fyrir sig málfrelsi og skoðanafrelsi. Illa ígrundaðar skoðanir eru ekki einkamál og geta verið beinlínis hættulegar, rasismi og fordómar eru dæmi um það. William K. Clifford lýsti þessu mjög vel í „Rétturinn til sannfæringar“. Það að vera kurteis og særa ekki aðra er ef til vill eitthvað sem maður ætti að temja sér fram yfir það að lifa í þeirri hugsum að telja það vera sinn rétt að skrifa ókvæðisorð í skjóli tölvuskjásins.

Það voru skrif um mig í DV um daginn og það sem stóð upp úr á kommentakerfinu þar, var að landsfrægur feministi lét ummæli falla sem mér þótti heldur leiðinleg. Ég get ekki skilið hvernig einstaklingur sem berst fyrir mannréttindum finnst það í lagi að svipta mig þeim grunnmannréttindum að vera ekki að tala illa til mín og niðurlægja á opinberum vettvangi. Það sem mér finnst ef til vill verst við þetta er að þetta er kona sem ég hef hingað til borið virðingu fyrir.

Hvaða flokkur? Ég hálf skammast mín fyrir áhugaleysi mitt þegar kemur að stjórnmálum. Ég er frjálshyggjumanneskja í grunninn og kann illa við að lifa við stýringu þar sem allt er bannað vegna þess að það þarf að hafa vit fyrir fólki.

Hvaða skemmtistaður? Ég hef ekki drukkið áfengi síðan 2006. Ég er bindindismanneskja og hef ekki farið á skemmtistað síðan það mátti reykja þar inni. Ég tel mig ekki hafa neitt að sækja niður í miðbæ, ég er ekki fyrir það að vera í kringum mikið af fólki og er einfari í eðli mínu.

Kostir:

Dugleg, ákveðin, ábyrg, stundvís, áreiðanleg, löngun til að vera réttsýn, kærleiksrík, nægjusöm, gáfuð, traust, góður vinur, brosmild og glöð.

Lestir?  Þver, get verið hrokafull, klaufi, morgunfúl, á erfitt með að treysta fólki, á erfitt með að fyrirgefa, skapstór, einræn, reiðist auðveldlega og ég er draslari.

Hver er fyndinn? Unnusti minn getur verið mjög hnyttinn og skemmtilegur. Pabbi minn er líka húmoristi

Hver er leiðinlegur?

Fólk er ekki leiðinlegt en hegðun getur verið það. Fólk sem er alltaf reitt og tuðandi yfir öllu er mjög fráhrindandi.

Trúir þú á drauga? Ég hef aldrei séð draug en ég hef enga ástæðu til að efast um að þeir sem segjast hafa séð eitthvað yfirnáttúrulegt séu bara ímyndunarveikir og alveg í ruglinu. Það er svo margt í þessu lífi sem við getum ekki útskýrt. Ég trúi því ekki að þessi jörð og það sem vísindin geta útskýrt sé það eina sem til er í þessum heimi.

Stærsta augnablikið? Fæðing barnanna minna

Mestu vonbrigðin?  

Ég var lögð í einelti í barnaskóla og sá tími er fullur af vonbrigðum og sársaukafullum minningum.

Hver er draumurinn? Verða hjúkrunarfræðingur og vera góð móðir. Ég er mjög hamingjusöm í dag og tel mig vera að lifa í mínum draumi.

Mesta afrek sem þú hefur unnið á þessu ári? Það mun koma í ljós á næstu mánuðum

Ertu búin að ná öllum þínum markmiðum? Nei, en ég er að vinna að því

Manstu eftir einhverjum brandara? Nei, ég er alveg hræðileg í að segja brandara ég fer alltaf að hlægja eða gleymi þeim í miðri sögu. Ég er meira að segja farin að hlægja núna þegar ég er að skrifa þetta og veit ekkert hversvegna

Mikilvægast í lífinu?

Vera góð manneskja og heiðarleg við sjálfa mig og aðra. Að láta drauma mína rætast og njóta hverrar stundar.