Einar Bárðarson varð fyrir bíl á hjóli sínu: Væri ekki til frásagnar hefði ég ekki haft hjálm

Einar Bárðarson athafnamaður varð fyrir bíl á reiðhjóli sínu í Fossvogi í gær og liggur nú laskaður á olnboga og hné heima hjá sér. Hann segir það enga spurningu að það hafi bjargað lífi sínu að hann var með hjálm.

Maður bara blótar hressilega þegar svona gerist og svo þakkar maður guði fyrir það að geta staðið upp aftur,

segir Einar, sem var koma úr Fossvogi og hjólaði inn á  Fossvogsveg í átt að brúnni yfir Kringlumýrarbraut.

Ég var að koma af hjólastíg og leit vel í kringum mig áður en ég fór út og götuna,

segir Einar en gatan liggur í beygju einmitt á þessum stað.

Í millitíðinni hafði bíll beygt inn í götuna. Bíllinn rennur upp að mér en honum er ekki beinlínis ekið á mig. Bílstjórinn virðist ekki hafa tekið eftir mér fremur en ég eftir honum. Þessi dans endaði þannig að ég missti jafnvægið og hjólið skaust undan mér í aðra átt.

Einar var á um 20 km hraða þegar þetta gerðist. Hann segir að bílinn hafi ýtt við sér með þessum afleiðingum frekar en að hann hefði keyrt á sig.

 Einar segir að um slys hafi verið að ræða og bílstjórinn hafi verið miður sín vegna þessa.

Ég átti erfitt með andardrátt og þetta leit frekar illa út í fyrstu,

segir Einar sem var fluttur með sjúkrabíl á Landspítalann.

Hann segir að allt hafi þó sloppið furðu vel. Olnboginn sé illa laskaður en óbrotinn og sama er að segja um vinstra hné. Miklar bólgur og ljót sár eru víða.

Hjálmurinn segir ákveðna sögu líka. Það er þannig far á honum að ég væri líklega ekki hérna að ræða málin í dag ef hann hefði ekki verið á sínum stað þegar þetta gerðist.

Einar hjólar mikið en þetta er í fyrsta sinn sem hann lendir í slysi á hjólinu.

Þetta var bara slys og nú ætla ég að jafna mig á þessu og svo held ég áfram að hjóla. Ég er heima fyrir núna - of slasaður til að sinna heimilisstörfum en ágætur í því að liggja upp í sófa. Þetta fór á besta veg miðað við hvernig þetta leit út. Ég hefði getað lent undir bílnum eða verið hjálmlaus og þá væri ég varla hérna að ræða málin.

Hann segir að algjör sprenging hafi orðið í hjólreiðum á landinu og hjól í umferðinni sennilega fimm sinnum fleiri nú en fyrir örfáum árum. Það sé þess vegna orðið tímabært að allir taki tillit þess að hve mikil umferð hjólandi fólks er í borginni.

Vinur Einars fór með hjólið hans í úttekt og tók við það tilefni myndina af honum sem birtist með fréttinni. Hann ber sömuleiðis fyrir miklar þakkir fyrir góðar móttökur á Landspítalanum þar sem hann segir starfsfólk hafa verið einstaklega ljúft í kynningu.