Sérfræðingur segir að Madeleine McCann hafi ekki verið rænt: „Það var eitthvað allt annað sem gerðist þetta kvöld“

Madeleine McCann.

Breskur sérfræðingur telur að rannsóknin á hvarfi Madeleine McCann sé peningasóun því henni hafi ekki verið rænt. Madeleine hvarf sporlaust frá sumardvalarstað í Algarve í Portúgal í maí 2007 og hefur ekkert til hennar spurst síðan. Hún var tæplega fjögurra ára þegar hún hvarf en hún var í fríi í Praia da Luz með foreldrum sínum og systkinum þegar hún hvarf.

Foreldrar hennar höfðu skilið börnin eftir í íbúðinni og sátu að snæðingi á nærliggjandi veitingastað. Þegar faðirinn fór til að líta eftir börnunum var Madeleine horfin. Á þeim tæpa áratug sem er liðinn frá hvarfi hennar hefur mikið verið fjallað um málið og margar kenningar hafa verið á lofti um það. Ljósmyndir af Madeleine hafa verið birtar óteljandi sinnum og margir kannast vel við andlit hennar þegar þeir sjá myndir af henni.

Breska lögreglan hefur rannsakað málið í öll þessi ár og er kostnaðurinn við rannsóknina nú orðinn sem nemur um 1,5 milljörðum íslenskra króna. Undanfarið hafa fleiri gagnrýnisraddir heyrst þar sem því er velt upp af hverju sé verið að eyða svo miklum peningum í þessa rannsókn á sama tíma og lögreglan hefur orðið að skera niður á mörgum sviðum vegna fjárskorts. Bent hefur verið á að mörg mál upplýsist aldrei og að mörg hundruð önnur börn hverfi frá fjölskyldum sínum.

Sue Hill, sem var meðal þeirra sem stýrði rannsókninni um tíma, kom fram í morgunþættinum Good Morning Britain fyrr í vikunni til að ræða málið. Þar sagði hún að nú væri kominn tími til að láta staðar numið.

„Þegar maður hugsar um hversu mörg morðmál eru óleyst og tekur allan niðurskurðinn hjá lögreglunni með í reikninginn þá finnst mér nauðsynlegt að við leggjum tilfinningarnar stundum til hliðar og segjum að nú sé nóg komið.“

Í sama streng tekur Pat Brown, sem er sérfræðingur í að persónugreina afbrotamenn og gera prófíla af þeim fyrir lögregluna. Hún hefur lengi fylgst með málinu og hefur komist að niðurstöðu um hver örlög Madeleine voru en Brown er sannfærð um að henni hafi ekki verið rænt.

„Það er tilgangslaust að nota alla þessa peninga í rannsóknina því þeir munu ekki lífga hana við aftur. Madeleine er dáin.“

Sagði hún í samtali við news.com/au.

Madeleine áður en hún hvarf og tölvugerð mynd af henni.

Brown gaf árið 2011 út bókina ´Profile of the Disapperance of Madeleine McCann´ þar sem hún fór nákvæmlega yfir málið. Í bókinni lýsir hún efasemdum sínum um að Madeleine hafi verið rænt eins og foreldrar hennar, Gerry og Kate McCann, hafa alla tíð haldið fram.

Þessi skoðun hennar hefur ekki breyst og Brown er sannfærð um að Madeleine sé dáin.

„Þegar ég geri greiningu á brotavettvangi byggi ég kenningu mína á sönnunargögnum og læt lögreglunni þau í té. Ég leita alltaf að skjölum og sönnunargögnum sem er hægt að nota fyrir dómi. Þegar ég greindi mál Madelein fann ég engin gögn sem styðja kenninguna um að henni hafi verið rænt.“

Sagði hún og bætti við:

„Það er mjög ólíklegt að henni hafi verið rænt ef litið er til tímans í kringum hvarfið, sönnunargagna á vettvangi og annarra hugsanlegra sönnunargagna.“

Brown telur lang líklegast að Madeleine hafi látist fyrir slysni og að síðan hafi dauða hennar verið leynt. Með þessu gefur hún sterklega í skyn að það séu foreldrar hennar sem standi á bak við harmleikinn.

„Sönnunargögnin styðja kenninguna um að óhapp hafi orðið af völdum vanrækslu eða lyfjagjafar. Ég er sannfærð um að líkið hafi verið flutt á afskekktan stað og muni aldrei finnast.“

Kate og Gerry McCann.

Á mánudaginn var skýrt frá því að breska lögreglan hefði nú fengið enn frekari fjárveitingu til að rannsaka málið en hún leitar nú að portúgölskum starfsmanni hótelsins og hefur verið lýst eftir honum en lögreglan vill yfirheyra hann.

„Það eru önnur börn sem hafa horfið í Bretlandi sem fá ekki svona mikla athygli. Það ætti að nota peningana í þeirra mál.“

Sagði Brown.