Hörð detox-ritdeila: Jónína Ben sakar blaðamann um að rífa niður ævistarfið

Tilefni deilunnar eru skrif Írisar um detox-meðferðir sem Jónína hefur boðið landsmönnum upp á. Íris gerir athugasemdir við meðferðirnar og gefur í skyn að sami árangur náist einfaldlega með því að nota almenna skynsemi í mataræði. Telur hún það lögbrot að halda því fram að meðferðin geti læknað öll mein. Enn fremur reyndi Íris að afla sér upplýsinga um pólska lækninn sem sér um meðferðirnar, meðal annars í gegnum Jónínu, en án árangurs.

Í athugasemdum við færslu Írisar svarar Jónína hörðum orðum. Sakar hún blaðamanninn um óvönduð vinnubrögð:

„Blaðamaðurinn skrifar síendurtekið að ég stundi stópípur á viðskiptavinum mínum. Það er eins og allt annað sem frá henni fer í þessari grein bull og vitleysa. Ég býð ekki upp á stólpípur. Ég er að gera hér mjög góða hluti og hér býð ég fólki upp á hámarks þjónustu og ef þú Íris færð nautn af því að rífa niður ævistarfið mitt í 29 ár þá máttu vel njóta. Ég tek ekkert mark á þínum skrifum héðan í frá.“

Íris svarar að hún viti vel hvað felist í orðinu „nútíma-ristilskolun.“ Hún fer hins vegar fram á að Jónína sýni fram á að meðferðin virki við þeim sjúkdómum sem haldið er fram.

„Ég, og áreiðanlega allur hinn vestræni heimur, mun bíða spennt eftir að lesa um að loksins er komin lækningameðferð við sykursýki, hjarta- og æðasjúkdómum, alkóhólisma, eiturlyfjafíkn, geðsjúkdómum, o.fl. o.fl. Ég skil annars ekki að Dr. Lemanczyk skuli ekki vera búin að skrifa um þetta í New England Journal of Medicine, synd að halda þessu frá umheiminum.

Ég fæ ekki séð hvernig mín gagnrýni á “nútíma-ristilskolun” jafngildir “niðurrifi ævistarfs” þíns. Það virðist a.m.k. ekki vera hörgull á fólki sem trúir á lækningamátt þess.“

Jónína svarar um hæl:

„Pólsku læknarnir sem rannsaka detox hafa báðir sagt við mig að þær þori ekki að birta nokkuð um detoxið af ótta við að vera drepnar af lyfjafyrirtækjunum.

Ristilskolkun er allt annað en stólpípa.

Telur þú að þú sért virtur blaðamaður ?

Báðir þessir læknar sem ég vinn með eru virtir læknar. Fólk streymir til þeirra í virðingu fyrir þekkingu þeirra reynslu, áræðni og árangri. Það dugar mér. Þær hakka ekki niður störf annarra, setja sig í dómarsæti, né upphefja sig á kostnað annarra. Þær rakka ekki niður það góða sem fólk gerir, hvað þá sem heil þjóð gerir. Þær vinna í jákvæðninni...Skrifaðu í jafnvægi um hlutina og gagnrýndu detox með rökum.“

Íris svarar með annarri færslu sem hún birtir í dag. Hún segist ekki þekkja Jónínu persónulega, en greinilegt sé af viðbrögðum hennar að dæma að hún þolir ekki gagnrýni.

Blogg Írisar á Eyjunni.

„Þeim, sem gagnrýna Jónínu, segir hún að “þegja”; þeir eru í hennar eigin orðum “menn sem telja sig yfir aðra hafna,” “heimskir,” “dónar”, “trúlausir,” “aumar sálir,” “frekir,” “gamaldags,” sem með því að voga sér að gagnrýna eitthvað af hennar verkum, gera sig seka um: ”rógburð,” “hallærislegt mjálm,” “heimsku,” “útúrsnúninga,” “annarlegar hvatir,” “Davíðshatur” (?), “bull,” “útúrsnúninga,” “atvinnuróg,” “frekju.”“

Jónína hefur enn ekki svarað nýjustu færslu Írisar.