Hagfræðiprófessor ósáttur við áróður um Icesave: Það að skrökva er lélegt viðskiptalíkan

Ögmundur Jónasson fyrrverandi ráðherra og Þórólfur Matthíasson hagfræðiprófessor takast á um Icesave

Þórólfur Matthíasson, hagfræðiprófessor, segir engum til gagns að það að skrökva um það í útlöndum að Ísland sé fjárhagslega á heljarþröm. Hann segir það að skrökva sé lélegt viðskiptalíkan. Ögmundur Jónasson, fyrrverandi ráðherra, segir skrif Þórólfs vera níðskrif.

Eins og Pressan skýrði frá skrifaði Þórólfur grein í norska blaðið Aftenposten í gær þar sem hann sagði að nei í þjóðaratkvæðagreiðslunni um Icesave-samninginn yrði margfalt dýrara en að standa við samninginn. Þórólfur segir við Pressuna að hann velti fyrir hvort staðan sé virkilega þannig að ekki megi aðrir tala í útlöndum um þessar mundir um málið en fulltrúar InDefense og Ólafur Arnarson.

Ögmundur Jónasson, fyrrverandi heilbrigðisráðherra, segir á heimasíðu sinni að grein Þórólfs sé níðskrif, og segir:

„Þessi grein er með þvílíkum ólíkindum að manni verður orða vant. Ekki er nóg með að hann tali málstað Íslands í Icesave deilunni niður. Hann jafnar  okkur sem erum á öndverðum meiði við hann sjálfan við bandaríska fjárglæfraloddarann Madoff, sem dæmdur var til fangelsisvistar í 150 ár fyrir fjármálasvindl!“

Og Ögmundur bætir við um grein Þórólfs:

„Grímulaust og gagnrýnislaust tekur hann upp málstað Breta og Hollendinga og grefur um leið undan okkar málstað og ber okkur sum hver út að auki!

Um  útreikninga og framsetningu Þórólfs má  fara mörgum orðum. Hann slær fram tölum og upphæðum sem byggðar eru á líkindareikningi og reiknar prófessorinn í einu og öllu málstað Íslendinga niður!“

Þórólfur segir við Pressuna að hann haldi að það fleyti Íslendingum ekki langt að treysta á almenningsálit sem byggi á ósönnum fullyrðingum. Að tala bara fagurgala í útlöndum geti reynst dýrt.

„Er það ekki svipað og þegar FME virðist hafa leyft sér að fara með fegraðar upplýsingar um fjárhagslega stöðu Landsbankans gagnvart Seðlabanka Hollands?  Var FME ekki bara að ástunda sanna föðurlandsást með þessu?  Ég held ekki.  Ég held að manni farnist best ef maður segir satt og rétt frá og reynir ekki að fegra myndina þegar það hentar eða mála hana dökkum litum þegar það hentar. Verði maður uppvís að því mun enginn treysta manni eða trúa.“

Og Þórólfur segir að lygar séu aldrei góðar.

„Ef það er eitthvað sem við ættum að hafa lært af Icesave málinu, þá er það það, að það að skrökva er lélegt viðskiptalíkan.  Starfsmaður hollenska fjármálaeftirlitsins heldur því fram að kollegar hans á Íslandi hafi skrökvað að sér og haldið því fram að staða Landsbankans væri betri en hún í raun var.  Núna virðist mér að margir vilji fara með hinn boðskapinn til útlanda, að við ástandið hér sé miklu verra en það í raun er.  Ég held að skrök sé ekki betra viðskiptalíkan í sambandi við lausn Icesave deilunnar en það var þegar til Icesave-vandans var sáð í upphafi að því er virðist með fegrun og skröki.“