Er hægt að renna á lyktina? Mýs finna mun á þvagi þeirra sem eru með krabbamein og heilbrigðra

Bandarískir og japanskir vísindamenn hafa fundi út að mýs finna lyktarmun á þvagi músa með lungnakrabbamein og heilbrigðra músa. Nú vilja þeir gera tilraun með að finna slíkt hið sama með manneskjur.

Árlega greinast um 100 Íslendingar með lungnakrabbamein og sýna rannsóknir hér á landi að aðeins um 11 - 12% þeirra eru lifandi eftir 5 ár, þó ekki sé hægt að alhæfa slíkt um einstaklinga þar sem ekki er tekið tillit til aldurs, útbreiðslu og ýmissa annarra þátta. Þó er hægt að segja að því fyrr sem meinið greinist því meiri líkur séu á bata.

Gary K. Beauchamp, líffræðingur við Monell Chemical Senses miðstöðinni í Bandaríkjunum, segir tímann skipta öllu og þar geti mýsnar komið til skjalanna.

„Æxlismyndun virðist breyta líkamslyktinni sem hægt er að greina með þefnæmum dýrum og fullkominni efnatækni. Niðurstöður rannsóknarokkar bendir til að lyktarþátturinn geti gert það að verkum að meinið greinist mun fyrr en nú er.“

Sérþjálfaðar mýs eru afar leiknar að finna lyktarmun á þvagi þeirra músa sem hafa lungnakrabba og hinna og segja vísindamenn að efnabreyting í líkamanum breyti lyktinni verulega í þvaginu. Virðist sem ákveðin lyktarefni hverfi úr þvaginu við myndun lungnakrabbameins.

Og svo leiknar virðast mýsnar á þetta að í 47 tilfellum af 50 voru mýsnar öruggar með að greina á milli sýktra og ósýktra músa.

Nú vilja vísindamennirnir taka þessa tilraun á næsta stig og athuga hvort hægt sé að finna lungnakrabba í fólki með því að lykta af þvaginu.

„Við vonumst til að geta notað þessar efnabreytingar til að finna merki um lungnakrabba í reykingamönnum. Þetta gæti orðið nothæf leið til að finna krabbamein mjög snemma í ferlinu.“

Áætlað er að einungis fjórðungur lungnakrabbameinstilfella uppgötvist nægilega snemma til að hægt sé að fjarlægja það með skurðaðgerð í tíma. Vísindamennirnir segjast bjartsýnir á þessa tilraun en benda þó á að þróun krabbameinsins taki aðeins örfáar vikur í músum en ár í mönnum.