08. feb. 2010 - 17:23
Steve Jobs, forstjóri Apple, kynnti iPad við hátíðlega viðhöfn í San Francisco í lok janúar. Getty Images
Svo virðist sem risakynning Apple á nýjustu afurð sinni, iPad margmiðlunartölvunni, hafi floppað illilega ef marka má nýja neytendakönnun sem gerð var í Bretlandi. Einungis 5 prósent aðspurðra segjast hafa virkilega þörf fyrir að kaupa sér iPad, á meðan ríflega 60 prósent sjá enga þörf fyrir þessa græju.
Gerðar voru tvær kannanir, ein fyrir kynninguna sem fram fór í San Francisco á dögunum og ein eftir kynninguna. Í fyrri könnuninni sögðust 49 prósent ekki þurfa á iPad að halda á meðan 30 prósent sögðust vilja fá frekari upplýsingar áður en þeir gerðu upp hug sinn. Í síðari könnuninni hafði þeim sem töldu sig geta lifað á iPad fjölgað í 61 prósent og 15 prósent sögðust þurfa meiri upplýsingar.
Verri fréttir fyrir Apple eru þær að í fyrri könnuninni sögðust 2 prósent örugglega munu kaupa sér iPad. Þeim hafði hins vegar aðeins fjölgað upp í 5 prósent í síðari könnuninni. Fjöldi óákveðinna var nánast sá sami milli kannanna, 18 og 19 prósent.
Svo virðist sem iPad með 3G tengimöguleikum verði ekki til þess að sannfæra neytendur. Alla vega sögðust 59 prósent ekki vilja borga meira fyrir slíka viðbót á meðan 12 prósent sögðust gera það. „Hvort þetta tæki slái í gegn verður að koma í ljós, en miðað við þessa könnun verður það að teljast ólíklegt,“ segir í könnun Retrevo.
Sérfræðingar hjá greiningarfyrirtækinu Needham & Co. gera ráð fyrir að Apple selji um 2 milljónir iPad tölva á árinu og 6 milljónir fyrir árslok 2011.