Bjarni Ben: Ætlaði aldrei að stöðva fréttaflutning DV - Ræðir ekki frekar við blaðið

Bjarni Benediktsson, formaður Sjálfstæðisflokksins, segist aldrei hafa farið fram á það við Hrein Loftsson að hann stöðvaði fréttaflutning blaðsins. Hann segist hafa hringt í Hrein eftir símtal við blaðamann DV. Hann ætlar ekki að ræða frekar við blaðið.

Á dv.is fyrr í dag var rætt við Hrein Loftsson sem sagði að Bjarni hafi krafist þess að DV hætti að fjalla um viðskipti í Makaó sem blaðið segir að Bjarni tengist. Bjarni hefur hins vegar neitað því alfarið að tengjast þessum viðskiptum.

Í yfirlýsingu sem Bjarni sendi Pressunni nú síðdegis þvertekur hann fyrir að hafa reynt að stöðva fréttaflutning blaðsins. Í yfirlýsingunni segir Bjarni:

„Undanfarna daga hefur DV slegið upp fréttum í þeim tilgangi að reyna að sýna fram á tengsl mín við fjárfestingar á Makaó.  Ég hef greint blaðinu frá því að ég hafi ekki komið nálægt ákvörðunum um þær fjárfestingar.

Í  dag hringdi blaðamaður DV, Ingi Vilhjálmsson, í mig vegna sama máls.   Ég tjáði honum að ég treysti ekki samskiptum við blaðið og því myndi ég ekki vilja bregðast sérstaklega við frekari spurningum.  Ég rakti rangfærslur blaðsins fyrir blaðamanninum og lýsti þeirri skoðun minni að ég teldi rétt að blaðið birti leiðréttingu vegna umfjöllunar sinnar.

Slíkar leiðréttingar hefur DV ekki áhuga á að birta.

Ég hafði því samband við eiganda blaðsins, Hrein Loftsson, og tjáði honum að ég teldi blaðamennsku af því tagi sem birst hefði síðastliðna daga algerlega óásættanlega.   Áður en ég hafði haft tök á að fara yfir samskipti mín við blaðið æsti Hreinn sig, sagðist ekki lúta mínu boðvaldi og sagði mér að eiga samskipti um þetta við ritsjórn blaðsins. Að svo búnu skellti hann á.

Stuttu síðar birtist viðtal við eigandann þar sem hann segist hafa spurt mig til hvers ég ætlaðist af honum og að ég hafi svarað með því að krefjast þess að hann stöðvaði fréttaflutning blaðsins.  Þessi hluti samtals okkar Hreins hefði kannski getað farið fram ef samtalið hefði orðið lengra.  En hann náði því miður ekki að bera spurninguna upp við mig áður en hann skellti á mig.

Ég hef því aldrei farið fram á að Hreinn Loftsson stöðvaði fréttaflutning DV, þó óvandaður sé.  Ætlun mín var einfaldlega sú að segja eiganda blaðsins skoðun mína á óásættanlegum vinnubrögðum blaðamanns sem þar starfar og útskýra fyrir honum í hverju ég teldi rangfærslur þess liggja.

Nú er komið í ljós að Hreini Loftssyni er alveg sama um með hvaða hætti fréttamenn á hans vegum starfa að fréttaflutningi.  Sá fréttaflutningur er hvorki vandaður, réttmætur né sanngjarn.

Það verður Hreinn Loftsson að eiga við sig.  Ég bið hann engu að síður að hafa rétt eftir þegar hann lýsir stuttum samskiptum okkar sem hann sjálfur batt enda á.

Framganga blaðamanna DV og eiganda blaðsins eru hins vegar þess eðlis að um þetta mál mun ég ekki frekar við þá ræða.“