100 daga áætlun: Ríkisstjórnin segist hafa klárað 32 verkefni - Pressan telur 27

Í tilkynningu sem forsætisráðuneytið sendi í morgun segir að ríkisstjórnin hafi lokið við 32 verkefni áætlunarinnar. Pressunni telst hins vegar til að einungis 27 verkefnum sé lokið.

Þannig segir í tilkynningunni að búið sé að afgreiða lánasamninga við vinaþjóðir. Það er vissulega rétt að vilyrði frá Svíum og Finnum um lánveitingar liggur fyrir, en samningarnir verða ekki undirritaðir fyrr en 1. júlí. Þar að auki haldast greiðslur í hendur við afgreiðslu Alþjóðagjaldeyrissjóðsins á endurskoðaðri áætlun sjóðsins og fer hún ekki fram fyrr en í ágúst.

Þá hefur frumvarp um persónukjör verið samþykkt í ríkisstjórn, en ekki verið lagt fyrir Alþingi eins og segir til um í áætluninni. Frumvarp um stjórnlagaþing liggur sömuleiðis ekki fyrir Alþingi.

Í áætluninni segir jafnframt að koma eigi á fót samráðsvettvangi milli ríkisstjórnar, sveitarfélaga, aðila vinnumarkaðarins og landbúnaðarins. Vísað er í 14. grein stöðugleikasáttmálans en eftir því sem Pressan kemst næst hefur þessum formlega vettvangi ekki verið komið á laggirnar. Jafnframt hefur starfshópur um endurskoðun fiskveiðistjórnunarkerfisins enn ekki verið skipaður.

Loks liggja engar upplýsingar fyrir um að svokallaðri tekjustofnanefnd hafi verið komið á fót.

Einu máli er jafnframt lokið að hálfu, það er reglur um nefndarþóknanir, risnu og ferðakostnað samþykktar af ríkisstjórn. Búið er að samþykkja reglur um dagpeninga ríkisstarfsmanna á ferðalögum innanlands.

Enn á eftir að framkvæma nokkrar mikilvægar aðgerðir í áætluninni. Má þar nefna afnám gjaldeyrishafta, áðurnefnda úttekt AGS, ákvörðun um framtíðareignarhald bankanna og endurmat á aðgerðaráætlun vegna skuldavanda heimilanna. Þá vekur athygli að sérstakt sparnaðarátak í ríkiskerfinu með þátttöku starfsmanna, stjórnenda og notenda þjónustunnar skuli enn ekki vera hafið í ljósi þess að fjármálaráðherra lagði nýverið fram frumvarp um stórfelldan niðurskurð í rekstri hins opinbera og skattahækkanir.

100 daga áætlunina má sjá hér að neðan. Tilkynningu ríkisstjórnarinnar má finna á vef forsætisráðuneytisins.

	Forsendur fjárlaga 2010 og áætlun í ríkisfjármálum til millilangs tíma afgreidd í ríkisstjórn. - sjá frumvarp.
	Skýrsla vegna áætlunar í ríkisfjármálum 2009 og áætlunar til millilangs tíma lögð fram á Alþingi. - sjá skýrslu.
	Ákvörðun um eigendastefnu og eignarhald bankanna tekin í ríkisstjórn. - Ríkisstjórnin vísar í frumvarp um Bankasýslu ríkisins.
	Endurmat á aðgerðaáætlun vegna skuldavanda heimilanna.
	Átak í kynningu og efldri þjónustu vegna greiðsluvandaúrræða fyrir heimili í skuldavanda.
	Þingsályktunartillaga vegna umsóknar Íslands um ESB lögð fram á Alþingi. - sjá þingsályktunartillögu.
	Endurskoðun hafin á fiskveiðistjórnunarkerfinu. - Ríkisstjórnin segir þessum lið lokið en starfshópurinn sem á að leiða vinnuna hefur ekki verið skipaður.
	Frumvarp um handfæraveiðar smábáta yfir sumartímann lagt fram á Alþingi. - sjá frumvarp.
	Lokið skal mikilvægum samningum til lausnar vegna erlendra eigenda krónubréfa.
	Lokavinna við samninga um erlendar kröfur – Icesave. - sjá tilkynningu.
	Lokavinna við samninga um erlend lán við vinaþjóðir. - Samningarnir verða undirritaðir 1. júlí. Greiðslurnar eru hins vegar háðar því að Alþjóðagjaldeyrissjóðurinn samþykki sameiginlega efnahagsáætlun sjóðsins og Íslands. Greiðslurnar koma í fjórum áföngum í tengslum við áætlanir sjóðsins. Þótt líta megi svo á að um formsatriði sé að ræða er reglan sú að ekkert er fast í hendi fyrr en þau hafa verið afgreidd.
	Ná samkomulagi við aðila vinnumarkaðarins um stöðugleikasáttmála. - sjá tilkynningu.
	Frumvarp lagt fram á Alþingi um aðgerðir gegn skattundanskotum. - Ekki var lagt fram sérstakt frumvarp hvað þetta varðar, en ákvæði um þetta er að finna í frumvarpi um ráðstafanir ríkisins í ríkisfjármálum. - sjá frumvarp.
	Fyrsta úttekt AGS vegna efnahagsáætlunarinnar afgreidd í stjórn AGS.
	Ákvörðun tekin um framtíðareignarhald nýju bankanna og mögulegt erlent eignarhald.
	Samkomulag milli nýju bankanna og kröfuhafa erlendu bankanna afgreitt.
	Dregið úr gjaldeyrishöftum.
	Frumvarp um persónukjör lagt fram á Alþingi. - Ríkisstjórnin hefur samþykkt málið en frumvarpinu hefur ekki verið dreift á yfirstandandi á þingi.
	Frumvarp lagt fram á Alþingi um ráðgefandi stjórnlagaþing sem kosið verði til samhliða sveitarstjórnarkosningum 2010. - Ríkisstjórnin segir þessum lið lokið en frumvarpið hefur ekki verið lagt fram á yfirstandandi þingi.
	Frumvarp um þjóðaratkvæðagreiðslur lagt fram á Alþingi. - sjá frumvarp.
	Endurskoðun á reglum um fjármál stjórnmálaflokka hafin. - sjá tilkynningu.
	Endurskoðun hafin á upplýsingalögum í því augnamiði að auka aðgengi almennings og fjölmiðla að upplýsingum stjórnarráðsins.- Forsætisráðherra skipaði starfshóp þann 29. júní sl.
	Frumvarp um eignaumsýslufélag lagt fram á Alþingi. - sjá frumvarp.
	Frumvarp um breytingu á lögum um sparisjóði lagt fram á Alþingi. - sjá frumvarp.
	Gripið til viðeigandi aðgerða til að lækka hæstu laun hjá ríkinu og félögum á þess vegum með það að leiðarljósi að enginn verði með hærri laun en forsætisráðherra. - sjá frumvarp.
	Frumvarp um breytingar á stjórnarráði Íslands lagt fram á Alþingi. - sjá frumvarp.
	Frumvarp lagt fram á Alþingi um að breyta lögum um LÍN þannig að ekki verði lengur krafist ábyrgðarmanna. - sjá frumvarp.
	Nýjar reglur um nefndarþóknanir, risnu og ferðakostnað samþykktar af ríkisstjórn. - Reglur hafa verið settar um dagpeninga ríkisstarfsmanna á ferðalögum innanlands. Ekkert liggur fyrir um dagpeninga á ferðalögum erlendis.
	Ný yfirstjórn ráðin í Seðlabanka Íslands. - sjá tilkynningu.
	Lokið við efnahagsreikninga nýju bankanna og þeir endurfjármagnaðir.
	Lokið við endurfjármögnun og –skipulagningu sparisjóða sem óskað hafa eftir stofnfjárframlagi frá ríkinu.
	Samráðsvettvangur ríkisstjórnar, sveitarfélaga, landbúnaðarins og aðila vinnumarkaðarins settur á fót. - Ríkisstjórnin vísar í 14. grein stöðugleikasáttmálans þar sem segir: „Allir aðilar þessa stöðugleikasáttmála samþykkja að vinna að framgangi sáttmálans og annarra brýnna samfélagsverkefna á formlegum samráðsvettvangi ofangreindra aðila auk Bændasamtakanna, undir forystu forsætisráðherra.“ Eftir því sem Pressan kemst næst hefur þessum formlega vettvangi ekki verið komið á fót.
	Byrjað verði að móta atvinnustefnu í samvinnu við aðila vinnumarkaðarins og háskólasamfélagsins. Meðal markmiða sé að Ísland verði meðal 10 samkeppnishæfustu landa heims árið 2020. - sjá tilkynningu.
	Viðræður hafnar við lífeyrissjóði og innlenda fjárfesta um að að koma að eflingu atvinnulífs með hinu opinbera. - sjá tilkynningu.
	Tillögur að nýju almannatryggingakerfi lagðar fyrir ríkisstjórn.
	Nýjar útlánareglur afgreiddar hjá LÍN. - sjá frétt LÍN.
	Hafin vinna við mótun heildstæðrar orkustefnu. Stefnan miði m.a. að því að endurnýjanlegir orkgjafar leysi innflutta orku af hólmi.
	Sett á fót tekjustofnanefnd sem hafi það hlutverk að vinna tillögu um breikkun og styrkingu tekjustofna sveitafélaga. - Ríkisstjórnin segir málinu lokið en hvergi er að að finna upplýsingar um að búið sé að skipa þessa nefnd.
	Náttúruverndaráætlun til ársins 2013 lögð fram á Alþingi. - sjá frumvarp.
	Ráðgefandi hópur útgerðarmanna og sjómanna um veiðiráðgjöf og nýtingu sjávarauðlinda og ástands lífríkis sjávar skipaður.
	Vinna hafin við mótun sóknaráætlana fyrir alla landshluta til eflingar atvinnulífs og lífsgæða til framtíðar. - sjá tilkynningu.
	Vinna hafin við mótun menningarstefnu til framtíðar í samráði við listamenn. - sjá tilkynningu.
	Efld úrræði Vinnumálastofnunar og Nýsköpunarmiðstöðvar til að bregðast við atvinnuleysi. - sjá frétt.
	Frumvarp um bætt umhverfi sprota og nýsköpunarfyrirtækja lagt fram á Alþingi.
	Átak til að fjölga sumarstörfum og nýjum atvinnutækifærum fyrir ungt fólk. - sjá tilkynningu.
	Sparnaðarátak í ríkiskerfinu með þátttöku starfsmanna, stjórnenda og notenda þjónustunnar sett í gang.
	Vinna hafin við gerð yfirlits um stöðu og þróun lykilstærða í samfélags- og efnahagsmálum þjóðarinnar og framtíðarvalkosti. - sjá tilkynningu.
	Stöður bankastjóra ríkisbankanna auglýstar lausar til umsóknar.