Hélt skilnaðarathöfn – Reif brúðkaupsmyndirnar ofan í gullfiska og fór með skilnaðarheiti

Brúðkaup hafa það orð á sér að vera fallegar athafnir, en hvað með hjónaskilnaði? Ekki síðri, segir hin nýfráskilda Yuan Li.

Ég var tekin að heiman af manninum mínum fyrir 28 árum og nú er ég komin aftur heim,

sagði Yuan á sviðinu við athöfnina.

Yuan Li yfirgaf manninn sinn fyrir skemmstu og flutti aftur heim í foreldrahús með börnin þeirra þrjú. Henni fannst skilnaðurinn svo mikill tímamótaviðburður í lífi sínu að hún ákvað að fagna honum ærlega með því sem hún kýs að kalla viðeigandi athöfn.

Í stað þess að jánka því að styðja maka sinn í blíðu og stríðu, staðfesti Yuan við þann sem athöfninni stýrði að hún myndi ekki eiga meiri samleið með fyrrum manni sínum og vildi ekki sjá hann aftur.

Hjúskaparheitin voru heldur ekki eftir bókinni en Yuan fór með svokölluð skilnaðarheit. Því næst reif hún brúðkaupsmyndirnar sínar á sviðinu og dreifði tætingnum ofan í tjörn, fulla af gullfiskum. Var það tákn þess að þar með væri hjónabandinu slitið.

Til að gera athöfnina enn furðulegri var mágkona Yuan mætt og hélt ræðu til heiðurs skilnaðinum.

Eiginmaður Yuan til 28 ára lét sig þó sem betur fer vanta við athöfnina, enda líklega ekki boðið.