30. jan. 2010 - 15:15
Darling, breski fjármálaráðherrann.
Alistair Darling, fjármálaráðherra Bretlands, segir sjálfsagt að hlýða á það hvað íslensk stjórnvöld hafi nýtt fram að færa í Icesave-deilunni, en staðreyndin sé sú að Ísland skuldi Bretlandi og Hollandi umtalsverða peninga og þá verði að endurgreiða fljótt og örugglega.
Þetta þarf að gerast innan eðlilegra tímamarka og á eðlilegum kjörum (e. But we have got to be satisfied that it will be repaid in a reasonable time on a reasonable basis)
Þetta kom fram í viðtali sjónvarpsmannsins Richard Quest á CNN við Darling í gærkvöldi, en Quest ræddi við fjármálaráðherrann í framhaldi af umtöluðu viðtali við Ólaf Ragnar Grímsson forseta Íslands, á CNN í gærkvöldi, sem Pressan hefur fjallað ítarlega um.
Quest spurði Darling beint í viðtalinu, sem var tekið upp á fundi Alþjóðaviðskiptastofnunarinnar í Davos í Sviss, hverju hann svaraði ásökunum forseta Íslands um að Bretar og Hollendingar legðu Íslendinga í einelti í málinu með óbilgjörnum kröfum sem gætu lagt efnahag landsins í rúst. Darling svaraði spurningunni ekki beint, en sagði mikilvægt að forseti Íslands segði að fjármunirnir væru Breta og Hollendinga og enginn ágreiningur væri uppi um þá staðreynd.
Í hreinskilni sagt held ég að það sé öllum fyrir bestu, einnig Íslendingum, að ganga frá þessu samkomulagi eins fljótt og auðið er,
sagði Darling ennfremur. Quest spurði þá hvort ekki væri ósanngjarnt að leggja svo þungar byrðar á Ísland, í ljósi þess að í raun væru þetta aðeins smáaurar fyrir bresk stjórnvöld sem taki gríðarlegar upphæðir að láni um þessar mundir, t.d. 200 milljarða punda í ár.
Darling svaraði því til að hér væri um grundvallaratriði að ræða (e. matter of principle). Bresk stjórnvöld hafi orðið að grípa inn til að vernda innstæðueigendur í Landsbankanum í Lundúnum og málið sé nú í hefðbundnum uppgjörsferli sem brýnt sé að koma í endanlegan farveg milli landanna eins skjótt og verða má.