Hildur Líf í héraðsdómi: Sektuð og svipt ökuréttindum - Fjarvera úr dómsal talin ígildi játningar

Hildur Líf ók undir áhrifum áfengis og var svipt ökuleyfinu

Hildur Líf Hreinsdóttir var ákærð fyrir að aka frá Háteigi yfir á Suðurgötu á Akranesi með 0,62 prómill af vínanda í blóðinu. Þetta var í júní 2010. Lögreglan stöðvaði aksturinn á Suðurgötu.

Eins og Pressan hefur greint frá neitaði hún sök en mætti svo ekki í dómsal til að halda uppi vörnum.

Lögreglustjórinn á Akranesi krafðist þess að hún yrði dæmd til refsingar og sviptingar ökuréttinda.

Var litið á fjarveru hennar sem ígildi játningar „enda fer sú niðurstaða ekki í bága við sakargögn“.

Svo segir í dómnum:

Refsing ákærðu, sem er með hreint sakavottorð, þykir hæfilega ákveðin 70.000 króna sekt til ríkissjóðs og komi sex daga fangelsi í stað sektarinnar verði hún eigi greidd innan fjögurra vikna frá birtingu dómsins.

Þá þykir rétt með vísan til 101. og 102. gr. umferðarlaga nr. 50/1987, að svipta ákærðu ökurétti í fjóra mánuði frá birtingu dómsins að telja.

Hún þarf því að bíða í mánuð í viðbót eftir að fá leyfi til að stjórna ökutæki á ný.

Samkvæmt viðmiðun lögreglu þykir sá, sem er með vínandamagn í blóði yfir 0,50 prómillum, ekki hæfur til að aka bíl.

Hildur Líf er þekkt fyrir fyrirsætustörf og að efna til VIP-samkvæmis fyrir þotuliðið á Íslandi ásamt vinkonu sinni Lilju Ingibjargardóttur. Hún var síðast í fréttum í tengslum við sakamál sem varðaði líkamlegt ofbeldi og frelsissviptingu þar sem hún bar vitni fyrir dómi.